Anda di sini

Manyin ngelengkaka pangku pengawa nyadi mandal presiden PBB

Advertisement
Manyin maya meri penerang ba aum pengarang berita kemari.
Manyin maya meri penerang ba aum pengarang berita kemari.

KUCHING: Datuk Amar Michael Manyin Jawong madahka diri deka nyurut diri tauka badu nyadi mandal presiden senior Parti Pesaka Bumiputera Bersatu (PBB).

"Aku udah madah ngagai (Sapit Presiden PBB Datuk Amar) Douglas Uggah iya nya aku deka ngeleka ke penudut nya.

"Enti nuan nadai agi megai enda ngira penuduk (enda dipilih nyadi pengari), nya enggau automatik nuan meri awak (dalam parti)," ku iya madahka pekara tu ba aum pengarang berita ke diatur ba Indu Opis PBB ditu kemari.

Ditanya sapa ke nganti iya, Manyin ti kala nyadi Kaban Kunsil Nengeri (ADUN) Tebedu madahka pekara tu ukai ari tanggungpengawa iya.

"Tu bepanggai ngagai parti," ku iya ti kala nyadi menteri kabinet negeri.

Manyin enda minta dipilih baru kena 18 Disember maya pengawa bepilih besai negeri taun nyin kemari. Iya orang ti keterubah dipilih nyadi ADUN Tebedu kenyau ari taun 1996.

Ba aum pengarang berita ke enda sama kemari, pemesai pengawa bepilih PBB Dato Awang Bemee Awang Ali Basah madahka Dato Sri Dr Stephen Rundi Utom diangkat nama dipilih nyadi senior vice presidents.

Senior vice presiden ke bukai iya nya Datuk Seri Fadillah Yusof, dipadah ngetanka penuduk nya.

Ditanya sekalaika iya diatu udah badu ari politik, Manyin madahka: "Ari segi politik, aku badu tauka nyurut diri tang politik agi dalam ati aku sereta aku agi ngukung PBB."

Bejaku baru iya madahka : "Baka ba pengawa bepilih ke udah diatur sebedau tu, aku kimpin tiap malam."

Iya besemaya deka terus meri sukung iya ngagai PBB enti iya agi tegap ba fizikal maya pengawa bepilih ke deka datai.

Iya madahka diri enda nesal badu ari politik sereta beterima kasih ngagai semua ke nyukung iya.

Lebuh dipinta neri lalau ngagai raban biak PBB, lebih agi ke udah dipilih nyadi pengari rayat, Manyin madahka sida mesti bisi nyadika tauka ngengkahka parti tinggi ari semua utai bukai.

"Keterubah, pemerat mesti diberi ngagai parti. Kedua, sida mesti meda tauka ibuhka sitak ke diarika. Ketiga, sida mesti ngemenuhka tangkup pengawa nyadi YB (dipilih nyadi pengari rayat).

"Enti nuan nitihka nya, nuan enggau parti deka tegap tauka kering," ku iya ti beumur 77 taun.

bekaul enggau tikas pengulih nyadi pengundi ke diubah umur ari 21 ngagai 18 tauka Undi18, Manyin madahka bisi pengelemi enggau pengelebih ba polisi pengawa bepilih baru tu.

Nitihku iya, orang biak beumur 18 taun ngagai 20 engka enda mayuh nemu nama utai politik.

Iya madahka; "sida ngena instincts/naluri sida" tang dipechaya PBB deka berengkah ngatur semnar tauka worksyop kena ngelatih raban biak ba renggat umur nya.
 

Advertisement