Anda di sini

Dua buah hotel diperambu digaga di Sematan: Abang Johari

Advertisement
Abang Johari lebuh bejalai ba jelatung melepu (pontoon) ke baru dipenyadi iya, seraya disempulang Azizul enggau Asfia sereta sida ke bukai, kemari. -gambar Penerangan
Abang Johari lebuh bejalai ba jelatung melepu (pontoon) ke baru dipenyadi iya, seraya disempulang Azizul enggau Asfia sereta sida ke bukai, kemari. -gambar Penerangan

KUCHING: Dua buah hotel betikas antarabansa sepenyampau RM120 juta diperambu deka digaga di kandang menua Sematan, sebengkah ari chara kena matak penatai temuai antarabansa.

Premier Sarawak, Datuk Patinggi Tan Sri Abang Johari Tun Openg madahka, hotel nya ti dikemansangka sida peribit deka nyendiaka peluang ekonomi enggau gawa ngagai peranak ba kandang menua Lundu, Sematan enggau nyengkaum Bau.

Ku iya, kelimpah ari jelatong ke baru tembu kandang menua Lundu Sematan mayuh produk tauka pematak dagang temuai nyengkaum Gunung Pueh, Taman Negara, Pulau Talang, alai nginti enggau ke bukai ke ulih matak temuai datai nyengkaum temuai antarabansa.

"Nya kebuah kitai udah besetuju dua buah hotel antarabansa deka digaga ba kandang menua tu. Sida peribit deka ngemansangka endur diau tu ba kandang menua Lundu enggau Sematan lebih agi Sematan, penyampau puku diperanakka ke udah sah iya nya RM120 juta.

"Hotel sebuah nya aku udah meda langkar iya baka sebuah hotel di Dubai iya nya baka Hotel Palm Jumeirah deka digaga ba Sematan. Nyadi kitai ditu deka baka Dubai ila.

"Dalam timpuh tiga taun tu sida nguji deka berengkah ngaga hotel tu," ku iya seraya setipak enggau dalam PCDS 2030 kitai ngena duit peribit sereta lebuh ngemansangka projek nya sida ulih lalu numbuh tauka nyendika peluang gawa baru .

Abang Johari madahka pekara tu lebuh iya bejaku ba pengawa bejadi 'Pontoon dan Landskap Tebingan Sungai Sematan sereta Penyampaian Hadiah Kepada Pemenang Joran Tanjong Datu' ti diatur ba Tebingan Sungai Sematan di Sematan, kemari.

Nitihku iya pemeranak puku ari menua luar berani sereta bisi pengarap ngagai kitai deka deka meranakka puku di menua tu pengudah meda gaya pemansang ti dipejalaika ditu.

"Enti sida (peribit) udah ngaga tu (hotel) ila, bekal ai enggau elektrik mega patut ditambah ungkup kandang menua tu," ku iya.

Bejaku baru iya madahka, kelimpah ari ti nyendiaka peluang gawa enggau matak temuai datai, pemansang ti dipejalaika ba kandang menua Lundu Sematan nya mega deka meri empas manah ngagai orang ti nyendiaka pemakai enggau orang betanam betupi ulih nyual asil, baka ngagai restoran.

Iya mega madahka raban biak kandang menua Lundu Sematan ulih nambahka pengelandik enggau penemu ba CENTEXS ke bisi nyendiaka mayuh bengkah latih nyengkaum bekaul enggau chara ngurus hotel.

Abang Johari dulu ari nya madahka, Lundu Sematan iya nya kandang menua ti bisi potensi dalam sektor dagang temuai.

"Kebendar bisi dua endur ulih alai orang tama ke menua tu. Siti, ari Petra Jaya nengah Rambungan, sereta siti agi nengah Bau. Lalu Bau enggau Lundu/Sematan tu sama bisi pematak dagang temuai.

"Nya kebuah kitai neruska kereja kitai, lebuh perintah PH suba narit projek Rambungan lalu ngeruga kaul enggau pelin ungkup Lundu. Aku nadai kakang ati, Perintah Sarawak deka neruskan pemansang jematan ngena duit Sarawak," ku iya.

Abang Johari madahka diri deka bejalaika pemansang seagi ngiring menua sereta iya beterima kasih ngagai Parti Pesaka Bumiputera Bersatu ti agi milih iya nyadi Presiden parti.

Sama bisi datai ba pengerami nya kemari, Speaker Kunsil Nengeri Tan Sri Datuk Amar Mohamad Asfia Awang Nassar, Menteri (Parlimen enggau Undang-Undang) Datuk Seri Wan Junaidi Tuanku Jaafar, Kaban Kunsil Negeri Tanjong Datu Azizul Annuar Adenan enggau sida ke bukai.
 

  • oleh
  • Advertisement