SIBU: Festival Tanda Antarabansa Sibu (SIDF) nyadi platform ngagai raban orang ke betanda ari selampur dunia bekunsika pengaya budaya sida.
Menteri Dagang Temuai, Industri Kreatif enggau Mandangka Seni Dato Sri Abdul Karim Rahman Hamzah madah, SIDF ukai semina program tang nyadi platform ngagai bala artis antarabansa merindang, mandangka pengelandik betanda sereta besilih penemu.
"SIDF iya program betanda ti mai bala artis antarabansa ari serata dunya ke Sibu. Kitai tau meda sida merindang maya konsert betanda ti diatur ba Dewan Suarah Sibu enggau merindang di luar ba Pasar Sentral Sibu.
"Kitai mega tau belajar sereta besilih penemu dalam woksyop betanda sereta nambahka penemu ari seminar ti manah enggau topik ke bebida ditu," ku iya.
Abdul Karim bejaku munyi nengah teks jaku iya ti dibaca Sapit Menteri Dagang Temuai, Industri Kreatif enggau Mandangka Seni Datuk Sebastian Ting maya Pengerami Muka SIDF 2022 ditu malam ensana.
Ku iya, Sibu iya nya pintu masuk penama ke pelilih tengah Sarawak sereta ngembuan kandang menua pesisir ti besai ti mungkur Bagi Menua Sarikei, Mukah, Kapit enggau Betong.
"Nya alai, iya nyadi palan bemacham seni, budaya enggau pesaka Sarawak. Opis Menteri Dagang Temuai, Industri Kreatif enggau Mandangka Seni Pmeda potensial besai ditu alai ngatur program enggau festival antarabansa sereta serantau.
"Pengelama betaun-taun, opis menteri udah nyukung program baka Pesta Kebudayaan Borneo (BCF), Sibu International BASE Jump enggau SIDF.
"Aku gaga ati ati laban ketetiga program tu diatur baru taun tu pengudah garis entara menua dibuka baru lalu prosedur operasyen standard (SOP) COVID-19 ditenduka.
"Kami meransang mayuh agi program sereta nyukung program 'The Stage' ti nerima sambut ke manah ari peranak Sibu kelebih agi ari raban nembiak," ku iya.
SIDF ti berambaika leka jaku 'Jejak Angin 2022' berengkah ari 9 nyentuk 11 Jun dipasuk enam raban orang ke betanda baka Jepun, Indonesia, India enggau Singapura.
Festival edisyen kesemilan tu diatur Teater Tanda Hornland lalu disukung Opis Menteri Dagang Temuai, Industri Kreatif enggau Mandangka Seni Sarawak (MTCP) nyengkaum Ois Kaunsil Sibu (MPS).
Sama bisi ngulu pengerami nya, Konsul Jeneral Republik Indonesia di Kuching Raden Sigit Witjaksono, Kaban Dewan Negara Senator Robert Lau, Sekretari Mendam Opis Menteri Dagang Temuai, Industri Kreatif enggau Mandangka Seni Hii Chang Kee, Kaban Parlimen Sibu Oscar Ling, Temenggung Datuk Vincent Lau, Direktor SIDF Chen Ing Kuan enggau Chairman Teater Tanda Hornland Wong Siaw Siong.