KUCHING: Peranak ba bagi menua Kota Samarahan deka nerima pemansang ti lebih holistik enggau tersusun nengah pengawa ngaga jalai alun baru kelimpah ari beberapa projek ti dipejalaika ari baruh Agensi Pembangunan Bersepadu Wilayah Samarahan (IRSDA).
Premier Sarawak, Datuk Patinggi Tan Sri Abang Johari Tun Openg madahka, nenfah IRSDA ti bechairmanka Dato Sri Abdul Karim Rahman Hamzah begulai enggau kaban komiti dalam ejensi nya udah ngelala bagi jalai ke deka dikemanahka agi.
Nitihku iya, bisi siti jalai ti deka dikemanahka agi iya nya jalai Kota Samarahan terus ke Asajaya, ti deka dikemesaika (dual carriage way) nyentuk ke Genturung Pendiau Sebuyau.
"Tu (ngaga jalai alun) enda nyengkaum dalam pemansang ari baruh IRSDA enggau nya tambah projek ari Premier Sarawak.
"Kitai deka ngaga projek jalai nya nyengkaum ngaga jematan tambah laban nya digagaka dual carriageway (jalan begembar) ari Gedong.
"Kebendar iya berengkah di Serian laban Serian bisi dua jalai iya nya sekalika digaga berengkah ba Jalai Gedong ke udah bisi diatu tuka ngaga jalai baru di Serian lalu tama ke Gedong.
"Jalai alun tu deka digaga baka Jalai Besai Pan Borneo ti deka tama ke Gedong terus ke Kota Samarahan sereta terus ke Sebuyau ,lalu ari Sebuyau deka ngagai kandang Ejensi Pemansang Sri Aman (SADA)," ku iya bejaku maya bejadi IRSDA ba sebengkah hotel ditu, kemari.
Nyema jalai alun dikemanah sereta ditambah, Abang Johari ke mega nyadi Penyanding Penemu IRSDA madah, nya deka nempa nya nyadi sebengkah kandang menua ti nerima mayuh pemansang enggau asil ekonomi ti lebih meruan.
Terang iya ti mega Menteri Wang enggau Ekonomi Baru, naka suku kedua 2022, lebih 600 projek udah dikemendarka ari baruh IRSDA ti beungkus RM1496 juta.
Nitihku iya, ari penyampau nya bisi 200 projek udah ditembuka lalu nyema semua projek tu ditembuka, perintah deka nambahka sekeda projek bukai kena ngangkatka pemansang ekonomi ba endur nya.
Dulu ari nya ku iya, IRSDA udah nerima ungkup belanja sepenyampau RM1.5 bilion kena bejalaika pemansang ba bagi menua Samarahan.
Terang iya, kelimpah ari pemansang infrastruktur IRSDA mega bejalaika tanggungpengawa ngaga perambu pemansang rama peranak sereta betanam betupi.
Abang Johari kelimpah ari nya madah, perintah deka nempa kerejasama enggau tebangkar ba pengawa ngasilka produk utai tanam ti bekualiti.
Kebuah pia ku iya, Sarawak bisi tanah ti besai sereta ami kelimpah bisi pengereja pengawa ti mayuh ke lalu ulih ngasilka produktiviti asil betanam betupi ti manah.
"Kandang menua kitai (Sarawak) iya nya kandang menua ti ulih ngeluarka pemakai sereta bisi peluang ngasilka produk ti bekualiti ke tau diimport," ku iya seraya madahka nya mega ngangkatka ekonomi enggau penatai pemisi peranak.
Kelimpah ari nya, Chairman IRSDA ti mega Menteri Dagang Temuai, Industri Kreatif enggau Mandangka Seni Dato Sri Abdul Karim Rahman Hamzah madah, pengawa numbuhka IRSDA siti ari pengawa kena nyukung agenda pemansang ti digaga di Kota Samarahan.
Nitihku iya, bisi empat komiti ari baruh IRSDA iya nya Komiti Mit Pemansang Dagang Temuai, Pemansang Infrastruktur, Pemansang Tebing Tasik, Ban, Sungai enggau Parit, enggau Pemansang Betanam Betupi.
"Nya alai beberapa projek ti digaga ari baruh IRSDA tu dikearapka ulih meri empas besai ngagai peranak kelebih agi ba bagi menua Kota Samarahan," ku iya.
Peranak di Samarahan mega dijamin deka terus ngasaika mayuh agi pemansang projek baru ti seruran digaga dalam kandang menua tu, ku iya.
Bisi datai maya nya kemari, Sapit Premier Sarawak Dato Sri Dr Sim Kui Hian, Menteri Utiliti enggau Telekomunikasyen Datuk Julaihi Narawi enggau pemesai ke bukai.