KUCHING: Bagi Menua Betong muka mayuh bengkah potensial dalam sektor dagang temuai lalu semina nganti maya aja ambika dikena, pia ku Sapit Premier Sarawak Datuk Amar Dounglas Embas.
Kaban Kunsil Negeri Bukit Saban nya madah, udah datai ba maya iya Betong dikemansang enggau betul.
Ambika chunto ku Uggah, Bukit Sado, siti palan kubu bujang berani legenda Iban enggau nasionalis Sarawak Rentap, nyadi siti ari palan ke bisi potensial.
Ku Uggah, Rentap enda nemu sebarang taktik perang tang iya udah milih tuchung Bukit Sadok ti amat strategik nyadi palan kubu iya.
“Kubu nya semina ulih dialahka Raja Charles Brooke pengudah tiga kali nguji, iya nya dalam bulan Oktober 1861 tang Rentap mujur ngerarika diri maya nya.
“Keterubah enggau kedua kali nguji iya nya dalam taun 1857 enggau 1858,” ku iya lebuh bejadi aum Metro Polytechnic Industrial Advisory Committee (IAC) Betong ditu,kemari.
Sama bisi ngulu aum nya, Ketuai Pemesai Eksekutif (CEO) STB Sharzede Datu Salleh Askor ke mega sapit chairman IAC.
Ngenang nya silik agi, Uggah madahka perintah negeri bulan siti nyin tadi udah ngemendarka RM15.9 juta kena ngaga replika kubu Rentap engau utai bukai ba Bukit Sadok.
"Tu mih chara ke pemadu manah kena ngingatka palan besejarah kelimpah ari bebasaka lagenda Rentap.
“Kelimpah ari nya mega, meri peluang ngagai mensia mayuh ditu nambahka pengelantang sosio-ekonomi sida nengah chara ngelaku sereta ngaul diri enggau budaya sida,” ku Uggah.
Bekaul enggau produk ke bisi potensi bukai, iya madahka nya nyengkaum beberapa buah rumah panjai asal, budaya enggau bemacham tradisyen bansa Iban, meresa sungai enggau kampung, bemacham program mulaika pemanah sungai enggau ikan tauka dikelala enggau nama Sistem Tagang sereta Kampung Melayu di Spaoh ti bisi program homestay.
Ku Uggah, sebuah padang bilun mega benung digaga di Bebuling, Spaoh, ungkup servis ngangkut barang enggau penumpang.
Padang bilun nya enggau Jalai Besai Pan Borneo ku iya, deka nempa Betong dalam kar dagang temuai.
Uggah mega ngarapka Opis Dagang Temuai Sarawak (STB) ulih meri bantu kena ngelala sereta meri langgur penemu pasal chara ke pemadu manah kena ngemansang enggau ngelakuka potensial tu.
Ku Uggah, iya enggau ADUN Layar Datuk Gerald Rentap Jabu mega deka meri sukung penuh.
Bekaul enggau politeknik, Uggah madahka sida deka meri semua sukung kena mantu nembiak sekula nya ambika nyulut dalam akademik.
“Kami deka bejalaika bagi pengawa kami bekaul enggau perengkaguna ti diguna ambika enviromen belajar ti lebih kondusif ulih disediaka.
Ngenang pasal aum nya, Uggah madahka nya diatur kena mantu politeknik nambahka pengelaku nembiak sekula dalam makit kereja.
"Ba pekara tu, kami deka berandau enggau kaban kunsi kami dalam industri dagang temuai enggau bank bekaul enggau utai ke diguna,” ku iya.