LIMBANG: Pemujur besai Gabungan Parti Sarawak (GPS) menang ba Pengawa Bepilih Negeri (PRN) udah nempa penegap politik di negeri tu kena nampung perambu perintah negeri majak ngemansangka Sarawak.
Sapit Menteri Pemansang Menua Pesisir Malaysia Datuk Hasbi Habibollah madah,mayuh perambu udah digaga Premier Sarawak Datuk Patinggi Tan Sri Abang Johari Tun Openg kena nambahka penatai pemisi negeri.
Ku iya, penegap politik di Malaysia kelebih agi di Sarawak beguna amat kena nentuka perintah ulih neruska agenda pemansang.
“Enti politik menua tauka negeri enda tegap, perintah pedis ngaga pemutus laban enda chukup sukung majoriti kelebih agi ba Parlimen tauka ba Kunsil Negeri (DUN),” ku iya lebuh bejaku ba Program Ngabang Gawai, Limbang kena Hari Satu tu tadi.
Sama bisi ngulu program nya, Residen Bagi Menua Limbang Sebi Abang.
Ku Kaban Parlimen Limbang nya baru, GPS begunaka mayuh agi pengari rayat ba Parlimen ti tau ngeringka agi sada rayat Sarawak ba pekara negika hak Sarawak.
Ku iya, diatu GPS semina bisi 18 iku pengari rayat ba Parlimen ari 31 iti kerusi.
“Kitai dekaka mayuh agi pengari rayat GPS ba Parlimen ambika sada kitai ari Sarawak kering agi kelebih agi kena negika hak Sarawak enggau Sempekat Malaysia (MA63).
“Nya alai aku ngarapka sapa aja chalun GPS ungkup kerusi Parlimen Limbang ba Pengawa Bepilih Besai Ke-15 (PRU15) ke deka datai, beri mih sukung penuh ngagai chalun nya awakka iya ulih menang lalu nampung pemansang, penegap politik enggau pengelantang rayat di menua kitai enggau di negeri tu,” ku iya.
Hasbi ngatur Program Ngabang Gawai pengelama dua hari ba 13 buah rumah panjai di sepemanjai Jalai Kubong enggau Ulu Pandaruan berengkah ari Hari Minggu nyin tadi.
Iya udah ngabang ngagai Rumah (Rh) Babai, Rh Sengat, Rh Imau, Rh Ajut, Rh Unong, Rh James Jimbau, Rh Baba, Rh Sintau, Rh Suring, Rh Tegong, Rh Madline, Rh Kalat enggau Rh Manai.