KUCHING: Pengereja pengawa perintah Sarawak nadai ditagang ngena jaku Inggeris lebuh ti bejalaika pengawa,pia ku Premier Sarawak Datuk Patinggi Tan Sri Abang Johari Tun Openg.
Ku iya,pengereja pengawa perintah negeri enda kena ukum enti ngena jaku Inggeris maya bejalaika pengawa perintah laban Jaku Inggeris agi nyadi jaku dominan global.
"Dalam Konstitusyen Sarawak,kitai bisi dua jaku rasmi.Taja pan kitai beratka Jaku Malaysia, kitai mega beratka Jaku Inggeris.Iya penetap penemu kitai lalu nya mega polisi kitai.
"Nya alai,pengereja pengawa perintah Sarawak,kita tau ngena jaku Inggeris.Taja pia, ungkup pengereja pengawa Perintah Besai,aku enda nemu laban tuan (master) kita bebida," ku iya
Iya bejaku munyi nya lebuh bejadi pengerami Makai Lemai Beserimbai enggau 50 taun Yayasan Sarawak udah ditumbuhka ba sebuah hotel tebilang ditu, kena malam Hari Dua tu tadi.
Ku Abang Johari, perintah negeri kebendar iya sebaka pemerat ba jaku Melayu enggau Inggeris ke dikena rayat.
Rayat Sarawak ku iya, mesti landik sereta meretika jaku Inggeris ambika ulih nitihka pemansang ke pemadu baru diatu dalam bidang teknologi.
"Ambika chunto,orang dagang tebilang di serata dunya ari China, Jack Ma,iya nya siku pengajar jaku Inggeris lalu iya numbuhka Alibaba pengudah mulaika diri ari Amerika Syarikat, ti pengujungka lalu ngubah ekonomi digital China.
"Nya alai,aku ngarapka ngena inisiatif tu kitai tau ngadaka rayat Sarawak ti landik dalam kededua jaku Inggeris enggau Melayu,kelimpah disikap ngena penemu ti diguna kena nitihka ubah dunia ke diatu," ku iya.
Kena 24 Mei tu tadi,Ketuai Sekretari Menua, Tan Sri Mohd Zuki Ali madahka Opis Servis Perintah mesti beratika silik atur ti tau ditinggang ngagai orang ti enda b eratka jaku tesau bekaul enggau pengawa ngenegapka jaku menua nya dalam servis perintah.
Penerang nya udah dirara bala kaban politik tmenua tu enggau raban Kabinet negeri, laban tebal agi ti bepenemu madahka pengawa ngukum pengereja pengawa perintah ti ngena jaku iya nya chara ti tinggal di belakang lalu tebal agi mensia mayuh antarabansa agi bekomunikasyen dalam jaku Inggeris.