KUCHING: Perintah negeri benung dalam proses ngambi institusyen pelajar tinggi (IPT) ti bisi pemerat tauka meri pemaik ari baruh Yayasan Sarawak.
Premier Sarawak Datuk Patinggi Tan Sri Abang Johari Tun Openg madahka, perintah negeri nengah Yayasan Sarawak udah ngambi Universiti Swinburne, Universiti Curtin Malaysia, Universiti Teknologi Sarawak (UTS) enggau Kolej Laila Taib, Sibu.
Lalu bisi dua agi dua IPT peribit agi dalam proses deka diambi iya nya Kolej Universiti i-CATS enggau Akademi Maritim Sarawak (SMA) di Sibu.
"Tuju kitai ngereja tu, keterubah, kena nyendiaka pelajar tinggi sama sebaka enggau ke disediaka universiti antarabansa. Kedua, kitai deka ke kualiti graduet setipak enggau sida ari semua bagi di dunya.
"(Enggau) Ketiga, kitai deka ke graduan ulih ngenyamaka diri ngena penemu ti diguna dalam ekosistem baru enggau digital," ku iya ba pengerami Makan Malam Sempena Sambutan Ulang tahun Ke-50 Yayasan Sarawak ditu, malam ensanus.
Bekaul enggau pekara nya, Abang Johari ngarapka universiti menua tu ulih bekerejasama enggau universiti tebilang antarabansa baka Universiti Stanford enggau Institut Teknologi Massachusetts (MIT) ke ngelama tu nempa mayuh orang dagang betikas dunya.
Perintah negeri ku iya, bisi juluk nyendiaka alternatif kena meri pelajar ngagai peranak menua tu kelimpah ari nyikap sistem pelajar perintah besai, awakka rayat Sarawak ulih nyapai penyulut ba renggat dunya.
ìKitai (Sarawak) deka nitihka penyulut Norway ba pengawa nyendiaka servis pelajar enda bebayar tauka pechuma ngagai rayat sida iya.
"Nya alai aku ngarapka enggau penumbuh 'dana kekayan berdaulat' deka meri penegap belanja ngagai Sarawak nyendiaka pelajar pemadu manah ngagai nembiak ditu," ku iya.
Ngenang pasal Sekula Antarabansa Yayasan Sarawak, Abang Johari madahka juluk iya nya kena meri peluang ngagai semua nembiak enda ngira latar belakang nyengkaum raban krang penatai pemisi bulih penguntung ari gaya belajar enggau tikas sistem pelajar lebih tinggi.
Dulu arinya, Direktor Yayasan Sarawak, Mersal Abang Rosli dalam jaku pengelalu madahka, Yayasan Sarawak diatu ngembuan aset berega RM1.8 bilion enggau lebih 1.83 juta rayat Sarawak udah bulih penguntung aru mayuh macham bantu kenyau ditumbuhka ba taun 1971.
Iya madahka, penyereta Yayasan Sarawak dalam pemansang pelajar di Sarawak ukai semina numpu tauka mekuh ngagai pemansang modal mensia aja, tang ngelui ari nya.
"Tu nyengkaum ngemansangka enam institusyen latih pengelandik iya nya Pusat Kecemerlangan Teknikal Sarawak (CENTEXS) di Kuching, Lundu, Betong, Mukah, Dalat enggau Lawas.
ìKelimpah ari nya, Yayasan Sarawak mega diasuh tauka diberi tangkup pengawa ngaga lima buah sekula peribit iya nya Sekula Antarabansa Sarawak ti digaga di Petra Jaya, Kuching/Serian, Sibu, Bintulu enggau Miri,î ku Mersal.
Nyerumba pengerami tu Abang Johari bejadi ëYayasan Sarawak Hall of Fameí iya nya pekara bekaul enggau orang ke kala nerima bantu pelajar ari Yayasan Sarawak ke udah tejapaika penyulut dalam profesyen enggau bidang diri empu nyengkaum politik enggau lumba enggau main.
Iya mega bisi diasuh nyuaka Anugerah Khas Perkhidmatan ngagai 31 staf Yayasan sarawak ke gawa pengelama tauka lebih 25 taun sereta bejadi Video 50 Tun Yayasan Sarawak.