MARUDI: Sapit Menteri ba Opis Premier Sarawak (Pengereja Pengawa, Imigresyen enggau Matau Projek) Datuk Gerawat Gala dekaka semua pengarap enggau budaya lama bansa Iban ditan ambika bisi dipeda sereta dipelajarka rebak baru.
Ku iya, rayat Sarawak amat benasit laban pupu bansa enggau etnik ngembuan bemacham pengarap enggau budaya, lalu sama bebasaka pangan diri.
Kaban Kunsil Negeri Mulu nya madah, tu meri peluang ngagai sesebengkah bansa mandangka budaya sida bemacham bengkah sereta nyelai.
"Ambika chunto, bansa Iban endang ngembuan mayuh pengarap lalu kitai semua (bansa enggau etnik bukai) amat bebasaka nya lalu sama berasai temegah ati laban bangga ulih meda nya," ku iya lebuh ke bejaku maya pengerami Gawai Mangkong Tiang ba Rumah Gawong Jantau, Sungai Seleju Asal ditu bedau lama udah.
Gawai Mangkong Tiang iya nya sebengkah pengawa ti diintu bansa Iban kena ngerami tauka merekat rumah panjai ti baru tembu digaga sereta alai sida diau.
Enti peranak pindah ngagai rumah baru, sida ngumbai Petara (Tuhan) datai ngabas rumah panjai nya sereta mega meri berekat.
Tradisyen nya diuluka siku ketuai iya nya Lemambang, lalu ungkup pengawa Gawai Mangkong Tiang Rumah Gawong, Lemambang Mapan Basik ari Sungai Stapang C ditu udah dikangau bejalaika pengawa nya.
Rumah panjai 19 pintu nya tembu digaga dalam bulan Mei 2021 lalu pengudah nya diuan sechara berenggat lalu pengawa Gawai Mangkong Tiang baru ulih diatur taun tu pengudah negeri tu nyingkang ngagai fasa endemik.
Sama bisi ngulu pengerami nya, Datuk Robert Laing Anyie enggau bini iya Datin Catherine Awing Wan, Pemancha Randi Bundan, Penghulu Jimbau Ena enggau bala tuai rumah panjai dalam kandang menua nya enggau kaban Opis Kaunsil Pelilih Menua Marudi (MDM).