KUCHING: Perintah Sarawak deka numbuhka makmal mansik ngasilka minyak bio ari 'alga' di negeri tu, iya nya sebengkah agi energi ulih dikemaru digaga ari alga.
Premier Sarawak, Datuk Patinggi Tan Sri Abang Johari Tun Openg madah, enti udah mujur ngaga makmal sereta bejalaika pansik, negeri tu ulih ngerandang sereta ngasilka Sustainable Aviation Fuel (SAF) ari alga ti ngasilka minyak ti tau dikena bilun.
Ku iya, negeri tu bisi potensial ngasilka minyak bio tu laban kategori 'alga' tu nadai ba menua bukai, lalu kelimpah ari ulih ngasilka alga nengah chara ditanam ti engkah dalam tangki.
"Lalu (asil minyak ari alga ) ulih dikena ba bilun ke disebut Sustainable Aviation Feul (SAF). Aku madah tadi jalai pemansut kitai mayuh lalu udah nya patut bisi kreativiti tauka pengelandik nengkebang, kedua, proses diatu ngena proses baru dalam industri ke dikumbai 'Six Sigma'.
"Nya alai aku deka ngaga makmal dulu. Diatu Opis Pemansang Ekonomi Sarawak (SDEC) bekerejasama enggau PETRONAS, lalu pengudah bisi makmal sereta udah dikemendarka, kitai deka meda bakani kitai ulih ngaga 'alga'.
"Enti kitai ulih ngeluarka mayuh alga, sereta ulih ngasilka mayuh minyak enggau berapa mayuh gilin minyak ulih diasilka, pekara ti baka tu patut diaduka. Aku udah minta ambika ngatur pansik tu, pengudah kitai bejalaika tu kitai ulih ngasilka SAF. Pansik ke dipejalaika urung iya dalam dua tauka tiga taun, enti penyampau nya betul kitai ngasilka," ku iya.
Abang Johari mansutka pekara tu lebuh dirandau raban pengarang berita pengudah bejadi Internasional Symposium on Digital Industry Transformastion 2022 ke diatur CENTEXS ba Auditorium CENTEXS Jalai sultan Tengah ditu, kemari.
Lebuh bejaku ngenang pekara ti sama nyerumba bejadi simposium nya, iya madahka pemujur bejalaika pansik sereta ngasilka SAF nya , Sarawak tau nempa kerejasama enggau menua ke berimbai ba Pulau Borneo.
"Menua kitai Borneo mayuh alga , nya alai kitai mega tau nempa kerejasama enggau menua baka Indonesia enggau Brunei ba pekara tu," ku iya.
Nambah nya, lebuh ditanya bekaul enggau bekal barang pemakai baka manuk enggau telu manuk di negeri tu, Abang Johari madahka negeri nadai betapi enggau penanggul bekal dua bansa barang nya.
"Baka ke dipadah ngagai aku, kitai nadai penanggul ba bekal manuk enggau telu. Tang engka ba barang ke dibeli tauka diimport kitai bisi penanggul," ku iya.
Kelimpah ari nya, bekaul enggau simposium antarabansa nya, Chairman CENTEXS Tan Sri Datuk Amar Mohamad Morshidi Abdul Ghani madahka Internasional Symposium on Digital Industry Transformastion 2022 ke dipenyadi nya, sebagi ari Program Teknologi Digital CENTEXS 2022 nyerumba Aum Besai Ekonomi Digital Antarabansa Sarawak (IDECS) 2022.
Ku iya, simposium ke diatur dua hari berunggu nya pasal transformasyen industri digital, CENTEXS National Digital Industry Transformation Hackathons, enggau mai teknologi imersif kena nempa pengawa ngambi STEM.
Iya madahka simposium nya bisi digulu Global Leading Industries Partners and Sarawak Industries baka Huawei, EON REality Inc., Keysight Technologies, Bosch Rexroth, Next Schlumberger, IBM, Sarawak Energy Berhad, Sarawak PETCHEM enggau Sarawak Metro.
"Objektif simposium tu iya nya nyendiaka platform ungkup ngemajuka sains enggau teknologi nuju ngagai transformasyen industri digital," ku iya.
Sama bisi ngulu pengerami tu, Sapit Premier Dato Sri Dr Sim Kui Hian enggau sida ke bukai.