KUCHING: Sarawak bisi hak ngena jaku Inggeris nyadi jaku rasmi kelimpah ari jaku Malaysia.
Chairman Opis Kaunsil Kota Samarahan (MPKS) Dato Peter Minos madah, kededua jaku tu tau dikena nyadi jaku rasmi.
"Aku enda nemu nama kebuah sekeda orang di Semenanjung Malaysia mantah kitai ngena jaku Inggeris.
"Kitai semua nemu jaku Inggeris nya jaku globasereta dikena serap nyauka dalam semua bidang industri, teknologi pemadah enggau komputer, seni, budaya, pekara wang, bank, undang - undang, diplomasi enggau ke bukai," ku iya.
Ku Minos, bisi utai enda betul ba raban anti-Inggeris di Semenanjung Malaysia.
Ba iya, raban anti-Inggeris tu enda pintar, tinggal pemansang ari sukut dalam runding sida.
"Enti raban anti-Inggeris di Semenanjung Malaysia deka tinggal pemansang, lakka aja sida laban kitai enda ulih mantu orang tipintar berunding.
"Kitai di Sarawak deka maju dalam semua aspek pengidup baka serata dunya, lalu nya alai kitai mesti ngena jaku Inggeris," ku iya.
Sarawak ku Minos, ngambi singkang ke betul ngena jaku Inggeris nyadi jaku rasmi kelimpah ari jaku Malaysia.
Enda nama jaku bantah jaku pejah ke diterima ari raban anti-Inggeris, Sarawak ku iya mesti anang begilik penemu ba pekara ngena jaku global tu.