KAPIT: Perintah Gabungan Parti Sarawak (GPS) udah ngemendarka aguh belanja RM353 juta kena ngemansangka semua Bagi Menua Kapit.
Premier Sarawak Datuk Patinggi Tan Sri Abang Johari Tun Abang Openg madah, ari penyampau nya RM190 juta diungkup kena mutarka penanggul jalai ti sekut ba pasar Kapit.
"Ke tanda kena meri terima kasih ngagai orang Kapit (pengudah nyaup GPS menang besai maya PRN12 ), kami deka ngangkatmanah semua jalai alun di Kapit tu ngena belanja RM190 juta.
"Tu perais ari kami ngagai orang Kapit lalu kami ngarapka jalan alun digaga nyadi besai agi lalu Kapit majak mansang nyadi sebuah mengeri di pelilih menua tengah," ku iya lebuh ke bejaku maya Pengerami Ngintu Hari Keputeraan Rasmi Ke Bawah Duli Yang Maha Mulia Seri Paduka Baginda Yang di-Pertuan Agong Ke-XVI renggat negeri Sarawak, ditu kemari.
Ku iya, sepenyampau RM105 juta mega dikemendarka ungkup projek ngaga jalai alun kena nyambung Sungai Katibas ke Sungai Bangkit di pelilih menua Song.
RM58 juta diungkup ke projek nyambung grid elekterik ari pasar Kapit ke Sungai Tunoh, Bukit Mabong ditu.
"Sarawak komited terus enggau dalam Malaysia sereta majak mansang baka dalam Konstitusyen eggau Sempakat Malaysia 1963. Pkara tu digaga nyadi sebagi ariwilayah numbuhka menua Malaysia," ku iya.
Ku iya, perintah mega ngembuan perambu enggau polisi ti manah kena nentuka negeri tu seruran likun, lantang sereta maju kelebih agi pengudah napi pemar maya pandemik COVID-19.
Ku Abang Johari, tu nyengkaum nyendia Post COVID Development Strategy 2030 (PCDS) kena nentuka ekonomi majak ngerembai maya betapi enggau dunya ti majar mar nyerumba taun 2030.
"Perintah merambu mayuh bengkah strategi baka ke bisi dalam PCDS 2030. Mayuh bengkah inisiatif ari baruh PCDS 2030 dipejalai kena nentuka negeri tu terus mansang lalu ekonomi tau diagihka ngagai semua rayat.
"Kelimpah ari nya, perintah mega nagit pemansang ekonomi sepenyampau 6.0 nyentuk 8.0 setaun lalu nyakena ngangkatka penatai pemisi rayat ba taun 2030.
"Dalam pekara tu, kerejasama enggau sukung penuh rayat lalu semua ke enggau nya beguna amat kena nentuka pemujur perambu tu. Arapka inisiatif ti dipejalaika perintah negeri ulih diasaika rayat," ku iya.
Abang Johari madah, Sarawak ngembu an mayuh pemansut penatai pemisi baka hidrogen,kampung, minyak enggau gis, asil ari betanam betupi, batu arang, industri, dagang temuai enggau ke bukai ti tau nyaup kena ngemansangka ekonomi ambika lebih tegap.
Ku iya, perintah mega numbuhka 'Sovereign Fund' ti nyadi tabung duit galau ungkup rebak biak Sarawak nyengkaum di Bagi Menua Kapit.
Sama bisi ngulu pengerami nya, Speaker Kunsil Negeri (DUN) Sarawak Tan Sri Datuk Amar Mohamad Asfia Awang Nassar enggau bini iya Dato Sri Fatimah Mohd Iskandar ngarika Tuai Megai Menua, Menteri ba Opis Premier Sarawak Datuk John Sikie Tayai, Menteri Dagang Dalam Negeri enggau Pekara Penguna, Dato Sri Alexander Nanta Linggi, Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol enggau bala bukai.