KUCHING: Perintah Sarawak udah ngemendarka agih belanja RM20 juta ari baruh Atur Pemansang Malaysia Lumpar Ke-12 (RMK12) ungkup 28 projek baru sereta ngangkatmanah palan SeDidik.
Menteri Pemansang Orang Indu, Nembiak Mit enggau Pengelantang Komuniti Dato Sri Fatimah Abdullah madah, enggau agih belanja tu perengkaguna ti manah agi deka disediaka nyengkaum dalam bejalaika insklusiviti berengkah ari renggat nembiak mit.
Ku iya, kenyau ari ngambi SeDidik kena 22 Julai 2020, opis menteri udah ngerembaika akses ngagai pemansang tumu nembiak mit enggau nambah tiga tadika sereta dua taska.
Tu nyadika penyampau semua institusyen pelajar tumu nembiak mit SeDidik bisi 98 buah dalam taun 2022 nyengkaum SeDidik Bandaria, SeDidik Lawas dan SeDidik Semariang Batu.
Dua taska ti ditumbuhka Taska Palan Kereja Unimas enggau Taska Palan Kereja Kompleks Pengelantang Komuniti Dalat dikena meri servis nyaup apai indai ti bekereja kelebih agi ti begunaka servis nyaga anak ti besemak enggau palan endur gawa.
“Enggau penambah akses sereta peminta ari komuniti di kandang menua nya, tu ngayanka SeDidik terus dipechaya raban komuniti.
“Berindik ari nya, kitai patut seruran ngangkatka kualiti pelajar, perengkaguna sereta kualiti pengajar SeDidik,” ku iya.
Iya madah munyi nya lebuh ti bejaku ba Pengerami Makai Lemai SeDidik beserimbai enggau Ngintu Hari Pengajar, 'Ramah Tamah' Aidilfitri sereta Gawai Dayak kena Hari Enam nyin tadi.
Kui Fatimah agi, siti ari pekara ti endang dikemerat dalam pemansang tumu nembiak mit iya nya kualaiti pengajar enggau orang ti nyaga kelebih agi ungkup SeDidik.
Naka 30 April 2022, bisi 84 iku ari 143 iku pengajar SeDidik bisi ambis enda Diploma dalam Pelajar Tumu Nembiak Mit.
Juluk opis menteri ku iya deka nyapai 100 peratus pengajar SeDidik ngembuan ambis nadai Diploma dalam Pelajar Tumu Nembiak Mit datai ba taun 2025.
Iya mega sama minta raban pengajar SeDidik ngambika terus ngangkatka pengelandik diri lalu enda ngetu naka Diploma aja.