SIBU: Raban nembiak patut ngemeratka mayuh macham polisi ti dipejalaika perintah ngambika sida enda tinggal peluang bulih pemaik ari polisi nya.
Sapit Menteri Pengerai Mensia Mayuh, Pengawa Berumah enggau Kaunsil Kandang Menua II Micheal Tiang madah, laban perintah berengkah bejalaika polisi nyadi pengundi automatik ba umur 18 taun, nya alai pemerat lebih ngagai raban nembiak.
Nitih ku iya, raban nembiak ti nyapai umur 18 taun ulih ngundi lebuh pengawa bepilih diatur.
“Berindik ari nya, raban nembiak mesti ngemeratka bekaul politik lalu enda ulih ngerundingka politik tu nadai kaul enggau sida.
“Agi pan, politik enggau pengidup tu bisi kaul ti rat, nya mega enda ulih dipisahka,” ku iya dalam teks jaku ti dibacha Kunsilor Opis Kaunsil Mengeri Sibu (SMC) Ling Hua Wee ti ngarika iya ba Pengerami Nutup Woksyop Pengelandik ditu, kemari.
Kaban Kunsil Nengeri (ADUN) Pelawan nya madah, sama baka ti meli rumah, perntah Sarawak bejalaika Skim Bantu Duit Jali Pengawa Berumah (SBPP) ti nentuka pemeli rumah ulih bebelika rumah ti keterubah dalam raban B40 enggau M40 dikena ngurangka tating penusah mayar deposit lebuh ti meli rumah.
Ku iya madah, polisi tu iya nya mekuh ngagai raban nembiak laban sida ti baru aja nembuka sekula lalu nyadi komuniti simpanan ti bisi taka.
“Laban pekara tu mih, perintah Sarawak udah bejalaika polisi tu lalu nyendiaka agih belanja RM10,000 dikena meri raban nembiak nyapai juluk ati bisi rumah diri empu,” ku iya nerang.
Tiang madah, ari sukut mayar pulai baru Wang Turu Tabung Pelajar Tinggi Nasional (PTPTN) ari Tabung Pelajar Tinggi Nasional, perintah Sarawak sama mantu raban nembiak mayar 30 peratus ari laluh tang semina ungkup rayat Sarawak aja.
“Sida ti mayar duit jali ti penuh enda ulih nerima bantu ti bekaul. Nya alai, raban nembiak patut ngemeratka ngagai sebarang polisi perintah sebarang maya ngambika sida bulih pemaik ari polisi nya,” ku iya.
Bekaul program nya, iya madah, pengelandik majak beguna ukai semina dikena ngiga jereki tang dikena ngangkatka tikas pengerindu orang, ngayanka pengelandik seni dalam berapa aspek lalu mensia mayuh deka meda seni pemandang nya, kelebih agi dalam muzik enggau tanda.
“Taja nengah pengelandik ulih dikena melanja pengidup enggau ngangkatka tikas pengerindu diri, tang tu iya nya enda ba semua tikas.
“Nyema enda nyapai tikas ti dipadahka, kita ukai semina enda ulih ngiga jereki, tang enda ulih ngangkatka tikas pengerindu diri, nya alai patut mayuhka belatih dalam ngemanahka pengelandik,” ku iya nerang.
Sama bisi datai iya nya Direktor Nembiak Methodist, Reverend Kiew Tie Siong enggau Ketuai Palan Main Asal Johnson Wee.