Anda di sini

Lanyun mekuhka pengawa ngaga ulu, sarung duku pengudah pinchin

Advertisement

KUCHING: BEBIDA ari orang bukai ke udah badu gawa tauka pinchin ti deka belelak pengudah bepuluh taun gawa, Joseph Lanyun Lupak siku orang ti kala nyadi kepala pengajar ngemeranka pengerindu iya ngaga ulu enggau sarung duku pengudah pinchin.

Iya ti asal ari Rumah Panjai Spuna, Betong siku ari orang ke endang rinduka pasal kraftangan tauka begaga ke barang pengelandik jari.

Laban udah bisi pengerindu ba kraftangan ku iya, dua taun sebedau pinchin ari pengawa nyadi pengajar iya endang udah nyendia sereta berengkah mupuk belajarka chara ngaga ulu enggau sarang duku nyentukka nyadi pengawa dagang.

Sebedau ngaga ulu enggau sarang duku iya meli isi tauka duku ari tukang kambuh lumur dua ke diau di mengeri besai Kuching.

"Rega aku nyual ulu enggau sarung ti udah siti set enggau duku, entara RM100 ngagai RM300 laban nitihka bansa kayu ke dikena. Kayu ke dikena aku baka kayu dabai, pitoh enggau temedak.

"Lalu dalam timpuh pengelama aku ke udah bejualka asil pengelandik jari enggau sida Perbadanan Kraftangan, ulu enggau sarang duku ti digaga aku udah datai di menua tasik baka Australia, New Zealand, sereta Thailand kelimpah ari diberi peranak menua kitai ditu enggau ari Semenanjung Malaysia," ku iya lebuh dikerandau ba sebengkah pengerami ti diatur ba Kuching Waterfront dalam bulan Februari taun tu tadi.

 Lanyun madangka kelai lumur tukang kamboh endur iya meli duku.
Lanyun madangka kelai lumur tukang kamboh endur iya meli duku.

Nerang silik bekaul enggau kayu ke dikena sereta kena napi peminta penguna tauka pemeli, iya madahka kelimpah ari ngiga kayu kediri iya mega bisi ngaji orang nyayat baka kayu dabai, pitoh enggau temedak.

Bekaul enggau pengelama iya nembuka ulu enggau sarung dulu, iya madahka pengudah lebih landik diatu dalam seminggu ulih nembuka entara lima ngagai enam iti.

"Laban diatu udah lebih landik, dalam sehari aku ulih nembu terus siti ulu enggau sarung dulu, nyengkaum ngaga ukir," ku iya.

Iya ti berengkah sereta berejista enggau Perbadanan Kraftangan kenyau ari taun 2018, madah diri berasai untung laban udah nyereta mayuh kus ke bisi diatur kena nambahka pengelandik enggau asil barang pengelandik jari ke dijual.

"Kena nyikap diri sereta ngangkatka pemanah asil pengelandik jari diri aku udah mayuh enggau kursus ke bisi disediaka. Nambah nya program ke diatur perintah sereta sida Perbadanan Kraftangan ti mai kami ke ngemeranka pengawa tu endang chukup mantu kami nyual asil pengelandik jari kami.

"Ambika chunto ba aku empu, maya Regatta ti diatur sebedau tu,sida temuai ari menua luar baka ari Thailand bisi meli asil pengelandik jari aku," ku iya.

Bebida ari orang bukai chara ngelakuka asil pengelandik jari, iya deka agi ngelaku enggau nyual asil pengelandik jari iya ngena chara betunga mua dibandingka ngena chara online.

Kelimpah ari ngaga sarang enggau ulu duku, iya mega bisi pengelandik ke dikereja orang indu baka ngaga selapuk, sulam, nusuk leka marik, pengias dinding enggau produk kereja kayu ke bukai.

  • oleh
  • Advertisement