KUCHING: Perintah Sarawak amat ngemeratka insiden penusah rumah angus ke nyadi di negeri tu ti ngujungka sida ngambi atur kena ngurangka empas ti ditapi mensia mayuh ti kena laban insiden nya.
Sapit Premier Sarawak, Datuk Amar Douglas Uggah Embas madah, sebarang chara kena perintah ngurangka empas penusah rumah angus, nya patut bisi lalau ari Opis Bomba enggau Penyah Penusah Malaysia (JPBM).
"Baka langgur penemu ti minta semua rumah panjai baru enggau ke deka digaga, rumah nya mesti bisi dinding penebat api ba tetiap rumah kena nyeliahka ari nyerarai. Taja pia, barang bagi chara nya kitai begunaka bomba ngaga pansik sereta madah ngagai kitai (perintah) chara nya.
"Nya alai, bomba patut meri lalau ngagai kitai enggau Opis Menteri Pengerai Mensia Mayuh, Pengawa Berumah enggau Kaunsil Kandang Menua ambika chara ke pemadu manah nya ulih ngurangka empas nyema bisi nyadi poenusah angus kelebih agi ti bekaul enggau rumah panjai," ku iya.
Iya bejaku munyi nya maya aum media pengudah bejadi Program Pengelikun Penusah Angus Beserimbai enggau Pengerami Hari Gawai, ba Indu Opis JBPM, Negeri Sarawak kemari. Berebak engagu nya,Direktor JBPM, Negeri Sarawak, Datu Khirudin Drahman madah, naka ke diatu langkar baru rumah panjai nya udah bisi.
"Langkar rumah panjai baru nya udah bisi digaga nengah kerejasama enggau Universiti Malaysia Sarawak (UNIMAS). Nya deka dikemansangka lalu dipejalaika nengah Opis Ngemansangka Pengawa Berumah (HDC)," ku iya.
Berebak enggau nya, bekaul enggau bantu ungkup orang ke dituntung penusah angus, Uggah madahka RM70,000 deka disediaka perintah kena mantu sida ke tasah nya.
"Sepenyampau maksimum RM70,000 lalu orang ke kena tuntung penusah tau minta agih belanja nya nengah chara minta ripot ari bomba lalu nganjung pom nya ngagai Opis Residen sebedau nya dianjung ngagai Sekretari Perintah Negeri," ku iya.