KUCHING: Peranak di kandang menua pesisir patut kering sereta bebendar deka nentuka asil betanam betupi dipejalaika sida ulih nyadi penyulut.
Sapit Premier Sarawak Datuk Amar Douglas Uggah Embas madah sida enda ulih jampat putus pengarap enggau sebarang penguji tauka penanggul kelebih agi maya pun bejalaika pengawa.
"Mayuh ti besebana bekaul enggau ungkus baja sereta utai empa jelu inang ti mar. Pia mega, bisi ti ngeripotka jelu siga baka kera nyadi penanggul ti pemadu besai.
"Tang sida ti agi tan, ambika chunto, ke udah nanam sawit enggau lada, diatu udah bulih penatai pemisi ti chukup manah ke alai sawit diatu dijual enggau rega RM1,300 setan," ku iya.
Iya madah munyi nya ba pengerami nyuaka geran ninting taun ngagai Komiti Pemansang enggau Pengelikun Genturung Pendiau (JKKK) rumah panjai sereta Gerempung Orang Indu ari 94 rumah panjai di sitak iya ba Bukit Saban di Rumah Mendit Unsu di Penom ditu, kemari.
Sama bisi datai ba pengerami tu iya nya Kaban Parlimen Betong Datuk Robert Lawson Chuat ti sama nyuaka geran ari agih belanja parlimen iya.
Ku Uggah madah, sitak Spaoh udah ditemu nyadi sebagi ari kandang menua Agropolitan Bukit Sadok enggau kandang menua bakul pemakai Betong/Mukah.
Berindik ari nya, ku iya, perintah udah ngemutuska deka ngaga projek padang bilun pandak (STOLport) di Bebuling, Spaoh sepenyampau RM108 juta.
"Sitak tu dipechaya ulih nyadi prospek besai nyadika sitak pemansut pemakai.
"Beserimbai enggau nya, rayat patut megai tanggungpengawa enggau nyereta aktiviti ti dipilih sida dalam nambahka penatai pemisi," ku iya.
Dulu ari nya, Robert nengah jaku pengelalu iya minta mensia mayuh ngambika terus ngasika prosedur operasyen standard (SOP) dalam belaban enggau COVID-19 maya ngintu pengerami Hari Gawai Dayak tu.
Iya madah, sida ti ngintu pengerami Hari Gawai patut bejejaga pengudah ti enda ulih ngintu pengerami nya baka ti udah kenyau ari dua taun ti udah.