Anda di sini

Madahka diri bekaul aktiviti Gawai ti ngaul orang ti mayuh ngagai raban ti bekuasa

Advertisement
Dr Syed Satahkatulah (duduk tujuh kiba) begulai enggau pemesai Opis Pengerai Sepital Limbang sama ngerichahka pengerami ngabang Sufian (empat kanan) enggau bini iya Siti Maryam di Kampung Sayong, kilah ensanus.
Dr Syed Satahkatulah (duduk tujuh kiba) begulai enggau pemesai Opis Pengerai Sepital Limbang sama ngerichahka pengerami ngabang Sufian (empat kanan) enggau bini iya Siti Maryam di Kampung Sayong, kilah ensanus.

LIMBANG: Pengawa ngatur aktiviti berami, begempuru tauka pengerami ngabang ti ngaul bala ke mayuh beserimbai enggau pengerami Hari Gawai Dayak di pelilih menua tu patut dipadahka ngagai raban ti bekuasa dalam sama nyeliahka pengelekai igi penyakit COVID-19.

Tuai Kunsilor Opis Kaunsil Pelilih Menua Limbang (MDL) Kunsilor Sufian Mohat madah, dikena bejalaika aktiviti pengerami ngabang sekalika di renggat rumah panjai, genturung pendiau tauka taman berumah patut dipadahka ngagai tuai rumah tauka ketuai komuniti di kandang menua diri.

“Barang sapa ti deka ngabang tauka deka ngatur akviti berami tauka 'rumah terbuka' beserimbai enggau Gawai patut madahka ngaga ejensi ti bekaul kelebih agi raban ti bekuasa dikena ngemuntangka kitai nemu nyema bisi nyadi pengelekai COVID-19.

“Pia mega sida ti deka ngatur pengerami ngabang di rumah panjai tauka genturung pendiau dilalau ngambika madah ngagai tuai rumah tauka ketuai komuniti di sitak diri empu,” ku iya lebuh ti ditanya pengarang berita ba Pengerami Ngabang ba rumah iya di Kampung Sayong, ditu, kilah ensanus.

Sama bisi datai iya nya bini iya Siti Maryam Fadhil enggau Direktor Sepital Limbang Dr Syed Satahkatulah Mohamed Kalik.

Sufian madah, sama mantu raban ti bekuasa kandang menua (PBT) dalam nagang pengelekai COVID-19 nyengkaum raban polis enggau Opis Menteri Pengerai Malaysia (KKM) kelebih agi menua tu ba fasa betukar ngagai endemik.

“Nyadi inidividu, kitai patut bisi tanggungpengawa dalam nyendiaka guna nyengkaum penuchi jari dikena nentuka virus enda ngelekai dalam kandang rumah tauka kandang endur diri.

“Sida ke deka pulai ke menua beserimbai enggau Gawai patut nentuka sida endag gerai sereta mega nyema pulai ari menua pengudah ngintu Gawai,” ku iya.

Sufiam madah, rayat di Limbang endang ditemu enggau ulah ti kemerah enggau pangan diri setipak enggau komuniti pupu raban bansa sereta main asal ti sama begulai ngintu pengerami Hari Gawai.

Nitih ku iya, bala pedagang ari baruh premis dagang enggau mensia mayuh mega dilalau ngambika seruran nyaga diri taja garis lalau (SOP) udah ditenduka.
 

Advertisement