Anda di sini

Pengawa ngangkatmanah PBH dipejalaika kena nentuka pengelikun di jalai alun

Advertisement
Dr Jerip meri jaku tangkan swereta beg ngagai orang ti deriba entukar kelai nyukung kimpin pengelikun jalai alun.
Dr Jerip meri jaku tangkan swereta beg ngagai orang ti deriba entukar kelai nyukung kimpin pengelikun jalai alun.

KUCHING: Kunteriktor enggau Opis Kereja Raya (JKR) udah ngatur sekeda pengawa ngangkatmanah di semanjai Jalai Besai Pan Borneo (PBH) ti agi dalam proses ngaga dikena nentuka trafik ti manah semanjai ngintu Hari Gawai taun tu.

Sapit Menteri Perengka Pengangkut I Datuk Dr Jerip Susil madah, perintah endang ngemeratka pengelikun penguna jalai alun ba jalai nya.

“Bisi berapa pengawa ngangkatmanah di semanjai jalai nya udah dipejalaika nyengkaum ngengkahka papan tanda tambah enggau 'alat pemantul chaya' ti efektif agi.

“Kelimpah ari nya, pengawa ngemanah enggau nyeruri jalai ti biluk ke ngeruga pengelikun mega dikemanah enggau naka ulih ngambika kes bebadi jalai alun ulih diseliahka,” ku iya.

Iya madah munyi nya ba Pengerami Bejadi Kimpin Pengelikun Jalai Alun beserimbai enggau Pegnerami Gawai Dayak Renggat Bagi Menua Kuching 2022 di Stesyen Petros, Darul Hana ditu, kemari.

Sama datai Sapit residen, ti ngarika Residen Bagi Menua Kuching Mackos Sibong ke mega Chairman Komiti Perengka Pengangkut Mensia Mayuh enggau Kaunsil Pengelikun Jalai Alun Bagi Menua Kuching enggau Temenggung Bansa Bidayuh Austin Dimin Niyon.

Dr Jerip madah, jalai alun dipelabaka deka berengkah mayuh perengka pengangkut berindik ari pengawa pulai ke menua beserimbai enggau pengerami Hari Gawai sereta aktiviti ngabang rayat pupu raban bansa di nengeri tu.

Beserimbai enggau nya, iya ngelalau sida ti deka pulaika menua diri ngambika ngatur pejalai dulu sereta deriba enggau likun, lalu pia mega enda ngelanggar atur enggau undang-undang jalai alun.

Nitih ku iya, perintah deka ngenyuahka kimpin pengelikun jalai alun sereta nambahka operasyen neritka atur polis trafik enggau Opis Perengka Pengangkut Darat (JPJ).

Pia mega, ku iya, pansik teknikal deka digaga bekaul enggau gaya jalai, kelimpah neruska inisiatif pelajar sereta pemereti ati bekaul pengelikun jalai alun ngagai raban nembiak sekula.

“Kimpin pengelikun jalai alun ti diatur ngelama tu ukai deka ngenusahka penguna jalai alun, tang dikena ngingatka sida bekaul guna ngasika atur jalai alun,” ku iya.

Dalam pekara bukai ti bekaul, Dr Jerip madah, perintah nengeri udah ngemendarka pengawa numbuhka Komiti Perengka Pengangkut Mensia Mayuh Nengeri Sarawak kena 21 November 2019.

“Tetiap bagi menua dipinta ngambika numbuhka Komiti Prengka Pengangkut Mensia Mayuh Renggat Bagi Menua diri.

“Tu iya nya dikena mantu Opis Menteri Perengka Pengangkut Sarawak dalam ngaga pelin, mansik penanggul sereta meri buah runding ngagai raban ti bekaul dalam pekara ti bekaul enggau perengka pengangkut mensia mayuh darat, sungai enggau tasik sereta langit,” ku iya nyemetak.
 

Advertisement