SARATOK: Komuniti Dayak ti deka ngintu pengerami Hari Gawai Dayak dilalau ngambika ngemeran chara pemakai ti manahka pengerai.
Pemesai Opis Pengerai Sepital Saratok Dr Amilia Atasha Linggoh (gambar) madah, disiplin diri dalam ngemeranka pemakai ti manahka pengerai endang beguna dalam nentuka tikas pengerai diri ba tikas ti pemadu manah.
“Ulah ti suah ngirup ai ke bisi alkohol ti lebih ari patut kelebih agi maya musin pengerami bansa tu ulih ngujungka bemacham risiko ngagai pengerai diri.
“Anang ngirup ai arak ti lebih ari ke patut tauka kitai patut ngurangka sereta manah agi nyeliahka, laban ulah ti bansa tu enda ngenataika pemaik ngagai pengerai tubuh.
“Kelimpah ari nya mega, ulah ti suah makai tauka ngirup utai ti manis, mayuh lemak enggau masin baka ai gis, ai manis luai, kuih enggau lauk ti ngembuan lemak enggau minyak ti mayuh mga patut ditagang,” ku Dr Amalia ngagai media, kemari.
Pia mega, iya sama bisi bekunsika tip pemakai ti manah ke patut dikemeran lebuh Hari Gawai iya nya enggau ngemeranka konsep 'suku-suku separuh' tauka suku-suku setengah baka ti suah diperansang Opis Menteri Pengerai Malaysia (KKM).
Nitih ku Dr Amilia, konsep tu reti nya suku ti keterubah pinggai diisi enggau karbohidrat baka asi, mi, ruti paun, ke alai kategori pemakai tu iya nya meri energi besai ngagai tubuh kitai.
“Ungkup suku ti kedua, diisi enggau protein baka ikan, manuk, dagin, telu enggau sebarang laun kachang ti endang diguna dalam pemesai, pemansang enggau ngubat tubuh.
“Setengah pinggai agi diisi enggau pemakai ti bisi 'serat', vitamin enggau mineral ke ulih mantu guna ti pemadu berat dalam tubuh mensia baka buah enggau sayur,” ku iya.
Iya mega nambah, ngemeranka seraka fizikal, seruran ngena sengkabung idung enggau mulut, kelimpah chara nuchi jari ti suah sekalika ngena sabun tauka 'sanitizer' jari mega patut dikemeranka maya musin pengerami tu.
“Ungkup sida ti bisi ngembuan simptom tauka enda tentu gerai, kitai ngelalau ngambika sida nyeliahka diri ari ti datai ngaul sebarang aktiviti baka pengawa ngabang,” ku Dr Amilia nyemetak.