KUCHING: Sektor peribit enggau ejensi perintah di nengeri tu patut ngatur mayuh agi program enggau aktiviti ti ulih mantu ngelakuka pengerindu nembiak dalam subjek Sains, Teknologi, Injiniring enggau Matematik (STEM).
Menteri Pelajar, Inovasyen enggau Pemansang Pengelandik Datuk Roland Sagah madah, nengeri mesti nyapai 60 peratus nembiak dalam STEM ari baruh Strategi Pemansang Pengudah COVID-19 (PCDS) 2030.
Ku iya, naka ke diatu urung 30 peratus nembiak Sarawak udah ngerejista dalam pakej STEM.
"Opis menteri aku diberi tanggungpengawa meda pemansang pengelandik ti diguna ungkup Sarawak. Dalam kes tu, Sarawak begunaka pemansik enggau graduet ti ngembuan pengelandik ti tinggi dikena nyapai aspirasyen nyadi kluster inovasyen global datai ba taun 2030.
"Tu semina ulih dijapai enggau ngembuan mayuh nembiak ngerejista dalam pakej STEM," ku iya maya ngemunka Hari Biodiversiti Sarawak (SBC) ditu bedau lama ti udah.
Bekaul enggau juluk jemah ila SBC, Sagah madahka, iya nganti penembu sereta dimunka Taman Bioindustri Sarawak (SBP) ti dipadahka Premier Sarawak Datuk Patinggi Tan Sri Abang Johari Tun Openg.
Iya pechaya, taman tu endang strategik dalam pengawa pemansik dalam rintai SBC.
Pia mega, ku Sagah, diatu SBC ngembuan sebuah makmal ti chukup moden di Sarawak ke dipelanja penuh ari perintah nengeri.
Maya pengerami nya, Sagah udah ngemataka pengawa nyain Sempekat Bekunsi Asil (BSA) ungkup projek LitSara entara SBC enggau enam komuniti peranak asal.