KUCHING: Opis Menteri Betanam Betupi Moden enggau Pemansang Kandang Menua deka terus chakah ngemansangka tanah NCR nengah mayuh bengkah program pemansang betanam betupi.
Menteri opis nya, Dato Sri Dr Stephen Rundi Utom madahka objektif besai ngemansangka tanah NCR kena muka kandang menua pesisir enggau ngangkatka tikas sosio-ekonomi pengempu tanah nengah mayuh bengkah program pemansang betanam betupi.
"Naka ke diatu, urung 770,000 hektar tanah NCR udah dikemansangka enggau tuju kena ngemansangka pengawa betanam betupi.
"Lalu bisi 250,000 hektar agi ti mungkur 65 kandang menua di selampur Sarawak mega udah dikemendarka ungkup mayuh bengkah projek pemansang betanam betupi," ku iya, kemari.
Dr Rundi madahka pekara tu lebuh ti nyimpul jurai Opis Menteri Betanam Betupi Moden enggau Pemansang Kandang Menua ba Hari Ketujuh Aum Kedua Penggal Keterubah Kunsil Negeri Sarawak Ke-19 ti diatur ba Kompleks DUN Sarawak ditu.
Iya madahka pemansang tanah NCR udah dilengkaska nengah skim pemansang chara besai kenyau ari taun 1970 an ngena 'Joint Venture Model' ba tengah taun 1970an.
Taja pia ku iya, pesereta dua bengkah projek tebal agi enda puas ati laban penguntung jauh ari ti ditaga sida.
Projek kelebih agi ari baruh Joint Venture Model, nadai meri dividen baka ti dikearapka taja pan projek udah 10 taun dipejalaika, ku iya.
"Berindik ari pekara tu, perintah benung mansik baru pejalai projek JV NCR ke udah bisi, kena nentuka pemaik semua orang dijaga.
"Alternatif ngagai model ngaduka projek enggau Model JV, nengah inisiatif sida empu, pengempu tanah NCR enggau pengawa betanam betupi dagang udah ngemeranka model dagang bukai iya nya Model Suwa (Leasing Model).
"Ari baruh model tu (Model Suwa), pengempu tanah deka ngasaika penatai pemisi tetap ari suwa tanah. Perintah, taja pia, deka beratika chara model tu kena nyaga pemaik sida ti bekaul.
"Naka ke diatu, bisi 15 projek ari baruh model tu mungkur 954 pengempu tanah enggau pemesai semua bisi 15,345 hektar," ku iya.