KUCHING: Bisi 657 buah genturung pendiau enggau rumah panjai tauka 14,100 ruang bilik bedau nerima bekal elekterik di selampur Sarawak.
Menteri Utiliti enggau Telekomunikasyen Sarawak Datuk Julaihi Narawi madahka, perintah Sarawak nengah opis menteri iya ngembuan visyen nyapai bungkur penuh bekal elekterik 24 jam di selampur Sarawak lebuh manggai taun 2025.
Nitihku iya, naka suku keterubah taun 2022, bungkur bekal elekterik udah manggai 98.6 peratus di serata Sarawak enggau bungkur elekterik di kandang menua pesisir sepenyampau 96.5 peratus. Kandang mengeri udah ngembuan bungkur bekal elekterik ti penuh.
"Perintah Sarawak udah ngungkupka sepenyampau RM2.37 bilion ba taun 2019 kena ngenyampatka program elektrifikasyen menua pesisir ari baruh Projek Rayat. Nyentuk diatu, bisi sepenyampau 657 buah genturung pendiau enggau rumah panjai tauka 14,100 ruang bilik (tauka 1.4 peratus) ke bedau nerima bekal elekterik di selampur Sarawak," ku iya.
Iya madahka pekara tu lebuh ti nyimpul jurai Opis Menteri Utiliti enggau Telekomunikasyen Sarawak ba Hari Keenam Aum Keterubah Penggal Keterubah Kunsil Negeri Sarawak Ke-19 ti diatur ba Kompleks DUN Sarawak ditu, kemari.
Bekaul enngau nya iya madahka pengawa nyambung grid ba voltan tinggi enggau voltan setengan deka dipanjaika enggau meraka serata Sarawak ke bisi jalai akses.
Lalu sistem 'off-grid' nengah hibrid enggau Skim Elektrifikasyen Menua Pesisir Alternatif Sarawak mega deka dipajakka ngagai kandang menua ulu ke nadai jalai akses, ku iya.
Projek rayat bekal ai menua pesisir ti dipejalaika kenyau ari taun 2019 nyengkaum ngaga 12 buah pencawang ke alai Sembilan buah udah tembu iya nya di Tatau, Kanowit, Nanga Kesit, Sebauh, Sangan, Ngungun, Julau, Pakan enggau Dalat. Lalu dua buah pencawang di Belaga enggau Long Lama benung digaga enggau sebuah sub-stesyen di BaíKelalan dalam renggat tinda.
Kedua, ngaga 'distribution line' besai Medium Voltage Covered Conductor sepemanjai 500 kilometer ti nyambungka sub-stesyen nya, sereta nyentuk diatu, projek tu udah 50 peratus tembu.
"Nambah nya projek rayat bekal elekterik menua pesisir ke dipejalaika kenyau ari tuan 2019 nyengkaum sepenyampau 58 buah projek RES Last Miles benung dipejalaika ti enggau tuju nyambung kepenudi ngagai 800 buah genturung pendiau enggau rumah panjai tauka 16,000 ruang bilik. Naka ke diatu, pejalai projek iya nya 60 peratus tembu.
"Ngagai kandang menua ulu, lima fasa projek SARES udah dipejalaika kenyau 2016 ti meri penguntung ngagai 408 buah genturung pendiau enggau ruamh panjai tauka 12,015 ruang bilik. Lalu SARES fasa keenam diatu ke digaga mungkur 141 buah genturung pendiau enggau rumah panjai tauka 2,863 ruang bilik enggau dipelabaka tembu suku keterubah taun 2023," ku iya.
Kena ngenegapka bekal elekterik menua pesisir deka ngerembaika sambung grid elekterik Sarawak, ku iya, opis menteri iya begulai enggau ejensi ti bejalaika pengawa Sarawak Energy, benung ngelangkar Pelin Besai Pemansang Elekterik Menua Pesisir 2021 - 2030.
Pelan Induk tu ku iya, dikemansangka dikena ngelala bagi kandang endur ngena sistem kediri (stand-alone system) ti deka bisi jalai akses dalam timpuh nya ngambika disambung ke grid elekterik Sarawak.
Pekara tu setipak enggau mayuh bengkah inisiatif pemansang ekonomi menua pesisir ti diperambu Perintah Sarawak ari baruh PCDS 2030 ti begunaka kuasa elekterik nyadi penyungkak pemansang, ku iya.