Anda di sini

30 endur deka dipilih alai bejalaika Program BMTKM di Sarawak

Advertisement

KUCHING: 30 endur deka dipilih alai bejalaika Program Basmi Miskin Tegar Keluarga Malaysia (BMTKM) di Sarawak.

Menteri ba Opis Menteri Besai (Ekonomi) Dato Sri Mustapa Mohamed  madah, ari baruh  fasa satu program nya,10 lokaliti endur udah dikelala.

"Program fasa satu ke mega projek keterubah deka diatur ujung bulan tu. Nya deka dipejalaika di Gedong; Kampung Seberang Sebuyau, Sebuyau;  Kampung Bakong, Lingga; Long Kajang, Belaga;  Kampung Spaoh, Betong; Baram / Ulu Tinjar;  Pakan; Lawas;  Daro;  enggau Telang Usan," ku iya.

Iya madah munyi maya aum media pengudah nemuai meri basa ngagai Premier Sarawak, Datuk Patinggi Tan Sri Abang Johari Tun Openg ba Kompleks Kunsil Negeri (DUN) ditu, kemari.

Mustapa disempulang Direktor Unit Perambu Ekonomi Negeri (EPU), Datu Dr Mohammad Abdullah Zaidel enggau Chairman  Opis Pemansang Ekonomi Sarawak (SEDC), Tan Sri Datuk Amar Dr Abdul Aziz Husain pada sidang media
Mustapa disempulang Direktor Unit Perambu Ekonomi Negeri (EPU), Datu Dr Mohammad Abdullah Zaidel enggau Chairman  Opis Pemansang Ekonomi Sarawak (SEDC), Tan Sri Datuk Amar Dr Abdul Aziz Husain ba aum pengarang berita.

Ku Mustapa, program nya sebagi ari pengawa ti dipejalaika perintah kena ngemunaska penyeranta manggai ba taun 2025 baka ti ditetapka dalam Atur Pemansang Malaysia Lumpar Ke-12 (RMK-12).

"Kena nyapai juluk nya, kami udah berandau enggau Premier Sarawak bekaul enggau program BMTKM ti deka dipejalaika kami kena nentuk rayat Malaysia kelebih agi raban orang ke seranta bulih penatai pemisi ke manah agi," ku iya.

Ku iya, program nya ukai semina mungkur kandang menua pesisir tang mega kandang mengeri ti deka dipejalaika ba 160 iti endur di menua tu.  

"Taja pia, fokus deka diberi ngagai Sarawak laban nyadi negeri ti ngerikodka penyampau penyeranta ti pemadu mayuh dalam nebya dalam taun tahun 2019, iya nya 9.0 peratus enti dibandingka enggau 5.6 peratus penyampau penyeranta nasional," ku iya.

Ku iya baru,bisi 180,009 ruang bilik ti seranta di serata menua naka 15 Mei taun tu.

Ditanya pasal isu inflasi, Mustapa madahka perintah besai deka majak beratka isu inflasi ti ditapi penguna di menua tu.

"Kami nemu sedar penguna ngasaika inflasi ke lebih tinggi di mengeri enggau menua pesisir, kelebih agi ba arega barang pemakai," ku iya.

Ku iya baru, isu inflasi benung ditapi di serata dunya ketegal mulaika pemanah ekonomi ti nyadi ari COVID-19 enggau perang Ukraine-Rusia.

Advertisement