KUCHING: Opis Penusun Adat Sarawak (MAIS) deka digaga nyadi opis korporat kena ngangkat tauka ngemanahka sereta nyadika iya sebuah institut pemansik enggau belajarka Adat.
Menteri ba Opis Premier Sarawak Datuk John Sikie Tayai madah, laban pengudah 50 taun MAIS ditumbuhka, diatu udah berengkah deka ngaga nya nyadi sebuah opis korporat.
“Enggau tu MAIS ulih bejalaika pengawa mansik,matih enggau nyendiaka akreditasyen dalam Adat.
“Latih enggau akreditasyen deka nempa raban ti bisi pematut enggau pemandai enggau penyikar nyadi akim sereta pengemeran ba Kort Bumiputera Sarawak.
“Deka ngaga tauka nyediaka kapasiti enggau sikar, institut Kaunsil ulih ngatur pengawa mansik enggau ngajar Adat kediri empu tauka nengah kerejasama institusyen tauka gerempung menua tu tauka luar,” ku iya.
Sikie mansutka pekara tu lebuh ti nyimpul jurai Opis Premier Sarawak ba Hari Keenam Aum Kedua Penggal Keterubah Kunsil Negeri Sarawak Ke-19 ti diatur ba Kompleks DUN Sarawak ditu, kemari.
Nitihku Sikie, ke diatu atur pengawa ngaga nya nyadi opis korporat agi ba renggat tumu sereta nyentuk ke nyadi nyata, Kaunsil agi tetap nyadi Unit ari baruh Opis Premier Sarawak.
MAIS ti ditumbuhka nyadi opis ba taun 1972, batang tuju iya kena nyaga, ngaga enggau ngelakuka Adat peranak asal Sarawak, ku iya.
Kenyau ditumbuhka ba taun 1972, MAIS udah ngaga undang – undang ke tuju Adat iya nya Adat Iban 1993; Adat Bidayuh 1994; Adet Kayan-Kenyah 1994; Adat Bisaya 2004; Adat Lun Bawang 2004; Adet Kelabit 2008; enggau Adet Penan (2011).
“Lima iti agi adat benung dalam proses digaga enggau disarap iya nya Adat Melanau, Adet Berawan, Adet Kajang, Adet Bagatan enggau Adet Kiput,” ku iya.