Anda di sini

Sekeda kandang menua ditemu bisi potensial kena nampung pemansang Agropolitan Gunung Sadok

Advertisement
 

KUCHING: Opis Menteri Betanam Betupi Moden enggau Pemansang Kandang Menua udah ngelala sekeda kandang menua ke bisi potensial kena nampung pemansang dalam kandang Agropolitan Gunung Sadok,Kunsil Negeri (DUN) Krian.

Sapit Menteri Betanam Betupi Moden enggau Pemansang Kandang Menua Datuk Dr Abdul Rahman Ismail (gambar) madah, ada dua perambu projek beung dialuska.

“Keterubah iya perambu Estet Getah enggau anggar pemesai 1,104 hektar dalam kandang Entaih,Ulu Gerenjang enggau Ng Long, Ulu Krian.

“Kedua iya perambu Estet Sawit enggau anggar pemesai 2,447 hektar dalam kandang Ulu Sebetan-Ulu Awik,” ku iya.

Iya madah munyi nya lebuh nyaut tanya Friday Belik (GPS-Krian) maya sesi tanya saut Aum Kunsil Negeri (DUN) ditu, kemari.

Friday nanya sekalika perintah bisi perambu ngemansangka sektor betupi bukai kena nampung pemansang Agropolitan Gunung Sadok di DUN Krian.

Ku Dr Abdul Rahman Ismail, Projek Agropolitan nya siti ari inisiatif Perintah Besai ari baruh Opis Menteri Pemansang Menua Pesisir ti berengkah di pejalaika Bandar di Sarawak kenyau ari taun 2009.

Di Sarawak ku iya,bisi lima projek Agropolitan udah dipejalaika baka di Batang Lupar, Sri Aman; Batang Sadong, Samarahan; Pulau Bruit, Mukah; Gunung Sadok, Betong; enggau Nanga Sekuau, Sibu.

Ungkup Agropolitan Gunung Sadok dalam DUN Krian ku iya, projek nanam getah udah dikemansangka baru berengkah ari taun 2010.

“Bisi 322.57 hektar udah ditanam Opis Bekuasa Pemansang Pekebun Mit Industri Getah (RISDA) enggau tanaman getah berengkah ari taun 2010 dalam empat fasa, lalu udah tembu dipejalaika kena 30 Mei 2021,” ku iya.

Iya mega madahkaOpis Menteri Pemansang Menua Pesisir Malaysia (KPLB) udah madah dalam Atur Pemansang Malaysia Lumpar Ke-12 (RMKe-12), nadai agi projek Agropolitan baru dikemendarka. 

“Nya diganti ngena Program Projek Bersepadu Pembangunan Ekonomi Kampung (PROSPEK). 

“Ungkup Sarawak, dua projek PROSPEK udah dikemendarka iya nya PROSPEK Matu (2019) enggau PROSPEK Lawas (2022). Taja pia, projek Agropolitan ke diatu deka majak dikemansangka,” ku iya.

Berebak enggau nya, Dr Abdul Rahman Ismail madahka bisi sekeda projek betanam betupi dipejalaika sekeda ejensi dalam kandang Agropolitan Gunung Sadok.

Ku iya, Opis Betanam Betupi Sarawak (DOA) udah bejalaika sekeda projek betanam betupi baka nanam lada, rian,nanam baru sawit enggau utai tanam bukai.

“Berebak enggau nya, Opis Ngempung enggau Mulaika Pemanah Tanah Sarawak (SALCRA) mega bisi ngemansangka tiga estet sawit iya nya Estet Sawit Saratok, Roban Selatan sereta Saribas enggau anggar pemesai tanah 4,261 Hektar.

“Ba Kadangn Pemansang Betanam Betupi Begulai (IADA) Kalaka- Saribas-Betong mega bisi ngaga lapan projek pemansang betanam betupi, iya nya Projek Ngemansangka Nanam Nenas, Projek Ngemansangka Nanam Buah, Projek Pemansang Integrasyen Betanam Betupi, Projek Ngemansangka Nanam Sayur enggau Utai Bukai, Projek Ngemansangka Industri Betupi, Projek Pemansang Ngenegap Agropemakai, Projek Pemansang Industri Akuakultur enggau Projek Pemansang Teknologi Fertigasyen,” ku iya.

Advertisement