Berindik ari kompeni Shell Malaysia mindahka palan operasyen serantau di Kuala Lumpur, Kota Kinabalu ke Miri
“Aku dipadahka ketuai enggau raban pengereja pengawa opis Shell, Miri deka nyadi siti palan ke strategik dalam pemansang industri minyak enggau gis di rantau tu”
Datuk Patinggi Tan Sri Abang Johari Tun Openg
Premier Sarawak
MIRI: Miri deka nyadi palan strategik dalam pemansang industri minyak enggau gis di rantau tu, berindik ari atur kompeni multinasional Shell Malaysia mindahka palan operasyen serantau di Kuala Lumpur enggau Kota Kinabalu kitu.
Premier Sarawak Patinggi Tan Sri Abang Johari Tun Openg madah, pekara tu antara pekara ti dipadahka ketuai enggau raban pengatur pengawa opis Shell lebuh iya enggau raban iya nemuai ngagai opis kompeni nya di The Hague, dua minggu nyin tadi.
Ku iya maya ke din, eksekutif kanan Shell meri raban ke enggau iya kin penerang pasal kuing kompeni nya di Sarawak jemah ila.
“Aku dipadahka ketuai enggau raban pengereja pengawa opis Shell, Miri deka nyadi siti palan ke strategik dalam pemansang industri minyak enggau gis di rantau tu.
“Tu deka nempa Miri nyadi palan pemansang ekonomi negeri dalam industri bekaul minyak enggau gis. Arapka Miri deka terus nyadi palan pematak ekonomi,” ku iya.
Abang Johari bejaku munyi nya ba pengerami ngintu Hari Raya Aidilfitriti diatur Lembaga Amanah Kebajikan Melayu Miri (LAKMM)ba sebuah hotel ditu, ensana.
Sama bisi ngulu pengerami nya, bini iya Puan Sri Datuk Amar Juma’ani Tun Datuk Tuanku Bujang, Sapit Menteri Pemansang Orang Indu enggau Nembiak Mit Datuk Rosey Yunus, Sapit Menteri Nembiak, Lumba enggau Main enggau Pemansang Orang Dagang Dr Ripin Lamat, Kaban Kunsil Negeri (ADUN) Tupong Fazzrudin Abdul Rahman enggau Chairman LAKMM Datuk Abdillah Abdul Rahim.
Ku iya, pemutus mindahka palan operasyen serantau kitu deka ngujungka urung 2,000 iku semua pemesai Shell deka pindah kitu.
“Kitai sama nemu, enti 2,000 iku staf nyengkaum pemesai kanan nya pindah kitu,reti nya utai ke dikena domestik deka nambah.
“Ari sukut ekonomi ditu, kuasa meli deka nambah.
"Enggau pemisi pemesai ari luar ti gawa enggau Shell ditu, nya udah tentu meri penambahka ba utai bukai ngagai Miri,” ku iya.
Iya optimis, kompeni sukung bukai ke gawa enggau Shell mega deka nitihka singkang mindahka palan operasyen ke Miri.
Ku Abang Johari,reti nya pengandal pemeranak puku ngagai Sarawak enggau Miri ba pengawa minyak gis deka majak ngerembai.
“Industri minyak enggau gis kitai deka majak ngerembai laban kitai ngembuan penegap politik, polisi dagang ti manah kelimpah ari mayuh pengeaja asal ti tau kena ngerembaika pemansang ekonomi,” ku iya.
Ngenang pekara bukai, Abang lebuh ke bejaku nya minta LAKMM nganjung keretas perambu ungkup perambu kena ngaga Surau Al Hidayah Tab Cinaq di Pujut 5 enggau ngangkatmanah lanskap Masjid At Taqwa.
Maya iya mega bisi ngemataka pengawa nyuaka replika chek RM50,000 ngagai LAKMM ari Naim Holdings Berhad ti disuaka pemangku menijar wilayah kompeni nya, Alice Ting enggau RM15,000 ari Samling Strategic Corporation Sdn Bhd ti disuaka penulung Ketuai Menijar, Albert Tan ngagai Abdillah.