MARUDI: Sapit Menteri ba Opis Premier (Imigresyen, Pengereja Pengawa enggau Matau Projek) Datuk Gerawat Gala madah, engka semina menua Malaysia aja ke bisi ngatur pengawa nyambut pengabang tetiap maya musim pengerami.
Baka ke sebelum nyadi pandemik COVID-19 dua taun ke udah,pengerami ke sekali tu baka Hari Raya Aidilfitri enggau Hari Gawai, pengawa nyambut pengabang diatur baru nitihka prosedur operasyen standard (SOP) ti terit laban menua agi betapi enggau penyakit nya.
"Ke sekali tu kitai deka ngintu pengerami Hari Gawai Dayak, lalu semua pupu bansa di Malaysia deka duduk makai begulai dalam pengelikun," ku iya.
Gerawat ke mega ADUN Mulu madah munyi nya lebuh ke bejaku maya Pengerami Makai Lemai Mantar Gawai Renggat Pelilih Menua Marudi ti diatur ba Dewan Suarah Baram ditu,malam Hari Enam nyin tadi.
Pengerami nya diatur Komiti Pemansang Poyut/Lubok Nibong ti berambaika leka jaku 'Berserakup Begulai Sejalai'.
Ba pengerami nya,Gerawat meri terima kasih ngagai penyukung beliau iya ti udah meri sukung lalu nentuka iya menang ba Pengaawa Bepilih Negeri Sarawak nyin tadi.
Berebak enggau nya,Gerawat bisi ngungkupka geran RM30,000 ngagai Komiti Pemansang Poyut/Lubok Nibong lalu Kaban Parlimen Baram, Anyi Ngau meri geran RM15,000 ditangkanka ADUN Telang Usan Dennis Ngau meri RM5,000.
Iya mega bisi nyuaka chek Projek Mit Pemansang Menua Pesisir kecil (MRP) ungkup sitak iya sepenyampau RM366,200 ngagai 17 serakup enggau Komiti Pemansang enggau Pengelikun Genturung Pendiau (JKKK) di Poyut/Lubok Nibong.
Kena ngerichahka agi pengerami nya, pengatur pengerami udah meri anugerah 'Lady of The Nite' ngagai Sima Lait lalu ungkup temuai lelaki 'Man of The Nite' diberi ngagai Daniel Bully.
Sama bisi ngulu pengerami nya,Datuk Robert Laing Anyie, Pemesai Pengatur Pengawa Reagan Edwin, Ketuai raban bansa Marudi Pemancha Randi Bundan enggau Kunsilor Simpson Njok Lenjau.