Anda di sini

Sarawak deka bulih mayuh asil ari aktiviti nyimpan karbon

Advertisement

KUCHING: Sarawak deka bulih mayuh agi asil ari aktiviti pengawa nyimpan karbon di sitak nya dalam timpuh ti besemak, ku Premier Sarawak Datuk Patinggi Tan Sri Abang Johari Tun Openg.

Ku iya madah, Sarawak dikemendarka nyimpan karbon dioksida berindik ari ubah Rang Undang-Undang (RUU) Kanun Tanah Negeri t dikemendarka bedau lama ti udah lalu ngemendarka nengeri tu nyaga bekal nyimpan karbon.

"Nama ti nyadi diatu iya nya India benung betapi enggau gelumbang panas lalu nasit mih Sarawak ngembuan mayuh utai tanam. Nya alai kitai mesti nyaga rampa menua tu. Enggau ngaga baka nya, kitai ulih nangkap karbon dioksida ke dilepaska ngagai angin lalu nyimpan nya dalam kandang endur tanah.

"Nya alai, barang sapa ti ingin nyimpan karbon di nengeri tu, sida mesti mayar dulu lalu tu deka nyadi siti agi chara dikena ngiga penatai pemisi ungkup Sarawak," ku iya. Iya madah munyi nya lebuh ti bejaku dalam pengerami Sama Riang Aidilfitri N7 Samariang begulai enggau Premier Sarawak di sebuah hotel tebilang ditu, kena malam Hari Enam.

Abang Johari enggau bini Datuk Amar Jumaíani Tun Tuanku Bujang begambar kenang enggau temuai dipebasa ke bukai ba pengerami Sama Riang Aidilfitri N7 Samariang Begulai enggau Premier Sarawak di Kuching.
Abang Johari enggau bini Datuk Amar Jumaíani Tun Tuanku Bujang begambar kenang enggau temuai dipebasa ke bukai ba pengerami Sama Riang Aidilfitri N7 Samariang Begulai enggau Premier Sarawak di Kuching.

Abang Johari madahka proses nangkap enggau nyimpan karbon dalam tanah nadai ngenataika empas ti enda manah ngagai rampa menua.

"Aktiviti nyimpan karbon tu nadai ngeruga transformasyen geologi kitai," ku iya.

Dulu ari nya, Abang Johari maya Aum Pengari Tiga Taun Sekali (TDC) Parti Sa'Ati Rayat Sarawak (SUPP) kena Hari Enam nya madah, menua Korea udah ngayanka pengerindu dalam nyimpan karbon sida ditu.

"Kemari (20 Mei) aku udah betemu enggau raban ari Korea lalu bala sida udah madahka sida mayuh ngemansutka karbon lalu deka nyimpan nya di nengeri kitai.

"Aku madahka sida, pengudah pengawa mansik teknikal digaga lalu lebuh transformasyen geologi dikemendarka enggau kapasiti ke udah bisi, sida ulih nyimpan karbon di Sarawak," ku iya.

Enggau nya, ku iya, tu deka nyadi siti agi pun penatai pemisi ngagai Sarawak.

Advertisement