Anda di sini

PRU15: SUPP udah nyikap diri unkup tujuh penuduk asal parti nya

Advertisement

KUCHING: Parti Sa'Ati Rayat Sarawak (SUPP) udah madahka diri besedia enggau tujuh kerusi parlimen asal ti diempu SUPP maya Pengawa Bepilih Besai Ke-15 (PRU15) ti deka datai.

Kerusi asal ti diempu SUPP iya nya Parlimen Sibu, Lanang, Miri, Serian, Mengeri Kuching, Stampin enggau Sarikei.

Presiden SUPP iya nya Dato Dri Dr Sim Kui Hian madah, pia mega parti ngetanka Sapit Presiden sida ke mega Kaban Parlimen Serian Datuk Seri Richard Riot Jaem bediri minta pilih di penuduk nya maya pengawa bepilih tu ila.

"Enggau gaya di Kuala Lumpur ti bisi 'belaya' enda ngasuh tekenyit nyema PRU15 diatur taun tu. SUPP besedia ungkup semua tujuh kerusi asal kami lalu Sapit Presiden kami, Datuk Seri Richard seruran besedia di Serian," ku iya.

Iya madah munyi nya lebuh ti bejaku ba pengerami bejadi Aum Pengari Ninting Taun (TDC) SUPP ti dipenyadi Premier Sarawak Datuk Patinggi Tan Sri Abang Johari Tun Openg ba Indu Opis SUPP ditu, ensanus.

Dr Sim bejaku besrimbai enggau pengerami bejadi TDC SUPP ti udah dipenyadika Abang Johari.
Dr Sim bejaku besrimbai enggau pengerami bejadi TDC SUPP ti udah dipenyadika Abang Johari.

Dr Sim ke mega Kaban Kunsil Nengeri (ADUN) Batu Kawah madah, semua pengari rayat SUPP di konstitusyen DUN mega deka mansangsama enggau komuniti pengudah menang maya Pengawa Bepilih Nengeri kena 18 Disember nyin tadi.

Ku iya, tetiap bulan, iya deka ngaga ti pemadu manah betemu enggau rayat begulai enggau enam ADUN SUPP baru di sitak sida laban tiap siku ari sida iya nya undi ngagai Dr Sim.

"PRU15 endang beguna ngagai Sarawak dalam minta dipejalaika hak Sarawak ke pengujung nya ditulis dalam dokumen ba 'Perlembagaan Malaysia' kena Disember taun nyin kemari ari baruh pegai Premier.

"SUPP udah ngemansutka MA63 kenyau ari taun 2013 lalu kitai ba renggat pengujung deka teulihka nya," ku iya nyemetak.

Iya mega beterima kasih ngagai semua ketuai enggau kaban parti SUPP di tetiap renggat sereta penyukung SUPP, parti komponen Gabungan Parti Sarawak (GPS) ba pengeransing sida ti nentuka parti ulih nyapai pemutus PRN ti manah sereta meri peluang ngagai SUPP enggau raban sida.

"Terima kasih mayuh ba kerejasama pengelama 52 taun entara Parti Pesaka Bumiputera Bersatu (PBB) enggau SUPP laban ti udah begempung sereta ngatur Sarawak kenyau ari taun 1970. PBB enggau SUPP iya nya bakih kunsi ti manah maya senang enggau tusah, maya diuji baka ba taun 1987 ngagai PBB lalu SUPP dalam taun 2013-2015, nya mih timpuh ti mayuh penguji.

"Tang nama ti pemadu beguna iya nya bakih kunsi ke ulih dipechaya sereta setia enggau lebih 50 taun sejarah sereta rikod ti udah nyata dipeda," ku iya seraya madahka PRN kena 18 Disember 2021, iya nya testimoni nama ti udah digaga begulai ungkup Sarawak.

Bekaul enggau TDC ti diatur, Dr Sim madah, ungkup TDC ke-25 SUPP nya, tu udah ngayanka ubah ti lanchar ba pemisi 50 pampang enggau gempung mayuh ketuai di pampang baru sereta veteran.

Taja pia, ku iya, sekalika ketuai baru tauka veteran, kaban parti lama tauka baru, parti agi ngembuan juluk sereta aspirasyen ke sama baka 'Bapa Pengasas' sida, 63 taun ti udah.

Advertisement