LIMBANG: Peranak genturung pendiau Rangau dilalau ngambika terus idup bebasaka pangan diri kelimpah nyeliahka ngena isu bekaul bansa ti ulih mambarka penyerakup.
Chairman Kawasan Rukun Tetangga (KRT) Rumah Perumahan Rakyat (RPR) Rangau Adinin Adol madah, peranak patut ngetanka konsep penyerakup komuniti seriris enggau pemisi pupu raban bansa ti diau di kandang endur berumah nya.
“Dipadahka, urung semilan etnik ti bisi diau di genturung pendiau Rangau lalu penyerakup enggau pengelantang pupu bansa patut ditegika enggau idup bela bebasaka pangan diri setipak enggau konsep penyerakup komuniti,” ku iya madah ba Program Ramah Mesra Aidilfitri, Mantar Gawai, Hari Pengajar enggau Hari Indai di Tabika Perpaduan RPR Rangau Limbang malam kilah ensanus.
Sama bisi datai iya nya Sapit Chairman Tahir Brahim.
Ku iya nerang, tanggungpengawa ngetanka penyerakup, pengelantang enggau pengelikun komuniti ukai semina bepanggai ba KRT aja tang ngagai semua raban ti megai tanggungpengawa begulai.
Adinin madah agi, KRT Rangau madahka program tu iya nya kelai ti manah dalam ngatur mayuh macham agi program bukai pengudah tu.
Ku iya, mayuh program ti diatur raban sida enda ulih dipejalaika kenyau dua taun ti udah berindik ari Atur Nagang Pemindah (PKP) ketegal pandemik COVID-19.
“Kitai minta ngambika peranak ulih nyereta program ti deka kitai atur pengudah tu,” ku iya.