KUCHING: Projek Sistem Bekal Ai Alternatif Sarawak (SAWAS) di Banting, Lingga ti beungkus urung RM10 juta dipelaba deka berengkah digaga dalam taun tu.
Sapit Menteri Utiliti enggau Telekomunikasyen II (Utiliti) Datuk Dr Abdul Rahman Junaidi (gambar) madahka ke diatu projek tu agi dalam proses mansik tinda.
“Ke penerang Kaban Yang Berhormat Bukit Begunan, dianggar sepenyampau 268 ruang bilik deka ngasaika penguntung ari projek Sarawak (Banting, Lingga),” ku iya lebuh ti nyaut tanya tambah ari Datuk Mong Dagang (GPS – Bukit Begunan), kemari.
Dr Abdul Rahman madahka pekara tu maya sesi tanya tambah ba Hari Keempat Aum Kedua Penggal Keterubah Kunsil Negeri Sarawak Ke-19 ti diatur ba Kompleks DUN Sarawak ditu.
Berebak enggau tu Henry madahka skop kereja projek SAWAS di Banting, Lingga nyengkaum kereja-kereja ngemanahka tekad enggau sistem penurasan (filtration system) ke udah bisi, masang saluran paip enggau ngaga tangka ai.
“Anggar ungkus projek tu iya nya RM10 juta,” ku iya.
Nitihku iya projek SAWAS Fasa II: Pakej 5 Selatan – Banting dalam DUN Bukit Begunan meri peguntung enggau pengelantang ngagai 268 ruang bilik ti nyengkaum sida ba Rh Bugis Ak Gerinang, Kpg, Chabu Ulu Banting bisi 27 ruang bilik; Rh. Limik ak Jeki, Kpg. Chabu Ili Banting (24); Rh. Merikan Ak Johnson, Kpg. Tanjung Punggu Banting (25); Rh. Encharang Ak Duji, Kpg Batu Tembang Banting (19); Rh. Amy Ak Edan, Kpg Bunga Raya Banting Tengah (25); Rh. Bruen Ak Juben, Kpg. Dampa Padang Banting (25); Rh. Somil Ak Babat, Kpg. Nansang Ulu Banting (22); Rh. Tan Chin Ak Bara, Kpg. Nansang Ili Banting (47); Rh. Gerunsin Ak Renggan, Kpg Banting Ili (29); Rh. Kendang Ak Nari, Kpg. Teluk Mulong Banting (5) enggau Rh. Baya Ak Bajau, Banting bisi 20 ruang bilik.