Anda di sini

Kubu Ranee ulih nyadi siti ari palan dagang temuai di Saratok

Advertisement

KUCHING: Kubu Ranee ti berumur 134 taun ulih nyadi ke kelai Saratok enggau siti palan dagang temuai di Sarawak.

Sapit Menteri Industri Kreatif enggau Seni Pemerindang Sarawak Datuk Snowdan Lawan madahka opis menteri tu begulai enggau Opis Muzium Sarawak benung bebendar deka meri perambu enggau ngazet Kubu Ranee nyadi siti ari begunan pesaka Sarawak ari baruh ordinan Warisan Sarawak 2019.

"Kubu Ranee udah bejalaika tangkup pengawa ke chukup beguna nyadi opis administrasyen kenyau digaga Charles Brooke ba taun 1888. Kubu Ranee tu suba kala nyadi Opis Kaunsil Pelilih Menua Saratok sebedau nyadi Palan Internet Komuniti ba taun 2014.

"Opis menteri seruran bebendar ngulihka ungkup belanja kena ngemanahka baru Kubu Ranee awakka ulih nyadi mercu tanda Saratok enggau mega nyadi siti palan dagang temuai di Sarawak,î ku iya.

Snowdan mansutka pekara tu lebuh ti nyaut tanya ari Mohamad Duri (GPS-Kalaka) ti nanya bekaul enggau ungkup belanja kena ngemanahka baru Kubu Ranee ba Hari Ketiga Aum Kedua Penggal Keterubah Kunsil Negeri Sarawak Ke-19 ba Kompleks DUN Sarawak ditu, kemari.

Nambah nya ditanya pemayuh kubu ke udah dikemanahka baru di Sarawak, Snowdan madahka, bisi lima kubu udah dikemanahka nengah Program Pemuliharaan dan Menaik Taraf Kubu Bersejarah ti dipejalaika Opis Muzium.

Lima buah kubu ke udah dikemanahka baru nyengkaum Kubu Alice di Sri Aman begunaka ungkus belanja RM5 juta ke udah dikemanahka ba bulan Disember 2014, Kubu Lily di Betong (RM5.5 juta enggau dikemenahka ba bulan September 2020), Kubu Emma di Kanowit (RM5.5 juta enggau dikemanahka Disember 2019), Kubu Brooke di Julau (RM5 juta enggau dikemanahka ba bulan Ogos 2020) enggau Kubu Hose di Marudi (RM4 juta sereta dikemanahka Jun 2020).

"Pengudah kubu tu dikemanahka, iya deka disikap ngena galeri ti ngayanka sejarah rama pemansang pekan enggau raban bansa ba menua tu. Ambika chunto,Kubu Alice udah tembu dikemanahka udah nyadi Muzium Warisan Sri Aman.

"Dalam kubu tu orang ke datai ulih merati enggau meretika tuju enggau tangkup pengawa kubu sereta meretika sejarah enggau budaya raban bansa Sri Aman. Pia mega Kubu Lili, Kubu Emma, Kubu Hose enggau Kubu Brooke ti baru dikemanahka enggau deka disekap galeri. Kubu-kubu tu nyadi pematak dagang temuai ke ulih meri peneleba enggau ke ngenang sejarah rama menua tu," ku iya.

  • oleh
  • Advertisement