Anda di sini

Tambahka penyuah servis penerebai bilun ke Limbang ari Kuching, Miri maya Gawai tu

Advertisement
 

LIMBANG: MASwings dipinta ngambika nambah penyuah servis penerebai bilun ke Limbang ari Kuching enggau Miri ungkup pengerami Hari Gawai Dayak tu baka ti nambahka penerebai ti diatur ungkup pengerami Hari Raya Aidilfitri.

Sapit Menteri Betanam Betupi Moden enggau Pemansang Kandang Menua Datuk Dr Abdul Rahman Ismail (gambar) madah, pengawa nambahka penyuah penerebai bilun ungkup sektor tu iya nya ungkup penerebai ari Limbang ke Kuching enggau Miri deka meri awak ngagai peranak di kandang menua utara nengeri tu pulai ngintu musin pengerami hari besai.

“Terima kasih ngagai semua raban, kelebih agi Opis Menteri Perengka Pengangkut Sarawak enggau Opis Menteri Perengka Pengangkut Malaysia (MOT) laban ti udah ninga enggau ngemendarka peminta rayat di utara Sarawak enggau nambah penyuah penerebai bilun Limbang ke Kuching enggau Miri.

“Penambah penerebai bilun tu endang mantu ungkup bala kaban pulai ngintu Hari Raya dalam timpuh dua minggu iya nya kena 28 April nyentukka 9 Mei,” ku iya madah ngagai pengarang berita kemari.

Iya ti mega Kaban Kunsil Nengeri A(DUN) Bukit Kota nya mega minta MASwings nambahka penyuah penerebai bilun beserimbai enggau pengerami ngintu Hari Gawai lalu mega ulih nurunka rega tambang ungkup sektor tu.

“Tu mih siti aja pilih (penerebai bilun) ungkup rayat di utara Sarawak laban menua ti berimbai agi nutup garis entara menua,” ku iya nambah.

Pia mega Dr Abdul Rahman ngarapka rega tambang ungkup sektor tu ulih diturunka ukai semina maya hari pengerami hari besai tang mega hari bukai.

Sebedau tu MASwings nambahka penyuah servis penerebai bilun ke Limbang ari Kuching enggau Miri ungkup timpuh 28 April nyentuk 9 Mei.

Ungkup pejalai Limbang ari Kuching, MASwings nyendiaka penerebai bilun tiga kali seminggu maya nya lalu ditambah enam kali penerebai ungkup timpuh nya.

Pia mega ungkup pejalai ke Limbang ari Miri, MASwings nyendiaka bisi 28 kali penerebai diatu lalu ditambah 12 kali penerebai ungkup timpuh nya.
 

Advertisement