MIRI: Sarawak mujur ngerikodka penambah penatai temuai ke nengeri tu iya nya bisi 500 peratus maya tiga bulan keterubah iya nya Januari, Februari enggau Mac taun tu endti dibandingka enggau timpuh ti sama taun nyin kemari.
Chairman Kaunsil Dagang Temuai Sarawak (STB) Dennis Ngau madahka tu iya nya kelai ti endang meri peransang dikena nyapai juluk penatai temuai ke Sarawak iya nya 1.2 juta iku temuai taun tu lalu pia mega iya pechaya STB ulih nyapai nya lalu nyangka deka lebih ari juluk ti udah ditetapka.
“Ba raban STB diri empu, kitai udah ngatur tusun program ngelaku lalu nyadika Sarawak ke palan dagang temuai ti dikerindu ati iya nya ti keterubah nya kitai neruska promosyen ke menua luar kena bulan Januari nyin tadi ke Dubai lalu mega di Kuala Lumpur kelimpah ngatur promosyen nengah platform chara 'online'.
“Raban ngelakuka dagang digital kitai di STB mega bebendar dalam ngelakuka Sarawak di media rama lalu kitai pechaya enggau langkar sereta strategi ti diatur tu deka ngasuh Sarawak dikerindu nyadi palan dagang temuai,” ku iya.
Iya madah munyi nya lebuh ti nerima penemuai meri basa Komiti Makai Lemai Apresiasyen Media beserimbai enggau Hari Pengarang Berita Nasional (HAWANA) ti betuaika pengatur nya Catherine Igang di Palan Servis Kunsil Nengeri (DUN) Telang Usan ditu kemari.
Dennis ti mega Kaban Kunsil Nengeri (ADUN) Telang Usan madahka pengawa ngatur dua festival muzik ikonik ke deka datai iya nya Rainforest Music Festival (RWMF) di Kuching enggau Borneo Jazz Festival (BJF) di Miri, respons ke diterima ari sukut bejualka tikit ngayanka penyampau ti chukup manah.
“Taja pia aku udah ngasuh raban pengatur STB ngenyakahka agi aktiviti promosyen tu laban juluk penatai ungkup RWMF iya nya bisi 5,000 penatai temuai lalu BJF bisi 2,000 ke 3,000 penatai temuai.
“Kelimpah ari nya, kededua program tu ukai semina diatur nengah chara fizikal tang mega sama diatur nengah chara online tauka nengah media rama, penatai temuai ti dipadahka kami bisi meda mega dipinta meli slot dikena sida meda program tu,” ku iya.
Kelimpah ar nya, iya madahka strategi 'libat urus' pengemeran industri menua tu deka terus dichakahka agi dalam ngemansangka baru industri dagang temuai pengudah abis COVID-19.
“Kebuah pia, pemayuh ni temuai ke datai ngagai Sarawak, pengemeran industri menua tu patut besedia keda mai temuai nya meda, nyendiaka perengka pengangkut enggau malin temuai sereta mayuh agi.
“Aku nerima penerang maya pandemik COVID-19 pengelama dua taun, endang bisi pengemeran industri ti betapi enggau pemar, tang aku mega andal ati deka madah nengah timbal ti aku terima, sida diatu udah pulai aktif baru ngidupka kompeni diri.
“Pia mega sida besedia nerima penatai temuai ti dipelabaka deka mayuh agi ke nengeri tu laban nengah timbal ti diterima kitai, balaa temuai diatu rindu agi palan ti nyendiaka rampa menua gadung, manah, mayuh macham pemakai lalu kitai di Sarawak ngembuan palan ti engkeman bansa nya,” ku iya nerang.
Beserimbai enggau nya, lebuh penemuai meri basa nya, Catherine udah nyuaka surat kangau ngagai Dennis ngambika datai ngulu Pengerami Makai Lemai Apresiasyen Media ke deka diatur kena 27 Mei tu ila di Hotel Mega Miri.
Sama bisi datai nyempulang iya Presiden Gerempung Pengarang Berita Utara Sarawak (NSJA) Andy Jong.