KUCHING: Direktor Sepital Besai Sarawak (HUS) Dr Ngian Hie Ung pechaya bidang pengawa nyadi indu misi ulih diangkat ari raban meri sukung ngagai raban profesional jemah ila.
Dikena nyapai tu, tetiap misi nitih ku Dr Ngian patut bisi runding deka terus belajar ninting maya dalam ngangkatka tikas profesionalisme diri dalam bidang nyadi misi.
“Mayuh menua di sunya tu udah ngenukuka pengawa nyadi misi tu dalam raban profesional tang bedau agi di Malaysia.
“Aku pechaya bidang nyadi misi tu ulih ditukuka nyadi raban profesional jemah ila lalu ukai agi dalam raban ti semina meri sukung,” ku iya.
Iya madah munyi nya lebuh ti bejaku bejadika Hari Indu Misi Sedunya Renggat Nengeri Sarawak 2022 di Auditorium Sepital Besai Sarawak (HUS) ditu, kemari.
Beserimbai enggau pengerami tu, Dr Ngian sama uda meri tabi basa ngagai semua misi senentang sukung sereta pengeransing sida dikena nentuka pesakit ulih diintu enggau manah.
Ku iya, taja pan jarang sekali misi nerima tabi masa ari pesakit tang bala misi tetap bejalaika tanggungpengawa sida enggau memanah.
Pia mega, ku iya madah, iya empu chukup bebasaka bala misi laban mayuh belajar ari sida semanjai ti megai pengawa dalam bidang perubat tu.
“Bala misi begai tanggungpengawa ti chukup beguna dalam industri pengerai.
“Dikena nyadi siku indu misi ti manah, patut bisi pengeransing ti tinggi dalam diri laban enggau pengeransing tu deka meri penegap mental enggau fizikal dalam bejalaika tanggungpengawa nyadi indu misi,” ku iya.
Berindik ari tu, beserimbai enggau ngintu Hari Indu Misi Sedunya Renggat Nengeri Sarawak 2022, sama diatur mega iya nya forum bekunsika peneleba nyadi misi lebuh ti betapi enggau pandemik COVID-19 sereta licha bekaul bidang pengawa nyad misi.
Raban HUS enggau kerejasama Serapi Care mega udah meri pemeri iya nya bisi 200 bungkus pemakai, 200 voucher pemakai sereta voucher rega diau di Serapi Hotel dikena ngenang basa raban terabai menua tu beserimbai enggau Hari Indu Misi Sedunya.