Anda di sini

Ngangkatka pemujur akademik nembiak agi nyadi agenda besai

Advertisement
Sagah enggau bala pemesai ke bukai begambar enggau pesereta program.
Sagah enggau bala pemesai ke bukai begambar enggau pesereta program.

KUCHING: Ngangkatka pemujur akademik nembiak agi nyadi agenda besai ketuai sekula tauka Opis Pelajar Pelilih Menua (PPD) enggau Opis Pelajar Negeri Sarawak.

Menteri Pelajar, Inovasyen enggau Pemansang Pengelandik Sarawak Datuk Roland Sagah Wee Inn madah, nya bepalasarka trend penyulut nembiak (standard 5: Pemujur Nembiak) sekula di Sarawak.

Nya alai ku iya, tangkup pengawa pemesai senior ngenanka chara belajar aktif dalam kelas beguna amat.

"Tangkup pengawa pengajar majak kompleks sereta   mar ba sesi sekula 2022/2023. Komitmen enggau pengawa ngangkatka kualiti belajar enggau ngajar (PdP), pengawa besai pengajar kena nyamin kualiti nembiak ke ditempa. Kebuah pia, pengajar mih individu ti nyura nembiak.

"Siti ari chara ngangkatka pemujur nembiak iya nya nentuka bisi ubah enggau chara nambah manah belama dalam inrtuksional kelebih agi ngiga chara, strategi enggau pedagogi ti setipak enggau meri empas.

"Pemesai instruksional patut meransang pengajar ngena mayuh bengkah chara enggau strategi PdP baka chara STEM, chara modular, flipped classroom, belajar bepelasarka modul, enggau ke bukai awakka potensial nembiak ti mayuh bengkah penau enggau pengeregas ulih dikerembaika ngagai tikas optimum," ku iya.

Sagah mansutka pekara tu lebuh bejaku bejadi Program Pemantapan Kepimpinan dan Pengurusan Pendidikan : kualiti @Sekolah (SKPMg2) Untuk Guru Penolong Kanan Pentadbiran PPD Betong Tahun 2022, ti diatur ba Hotel Seri Simanggang, Sri Aman ensanus.

Bekaul enggau program nya, bisi 54 iku pesereta  nyengkaum Pengajar Penulung Kanan (PKP) ari PPD Betong ke 4 ngulu woksyop 3 hari berunggu (10 ngagai 12 Mei 2022).

Tuju program tu iya nya dikena nambahka penemu enggau pengelandik ngaduka kualiti sekula ba raban PKP dalam bidang organisasyen, kurikulum, kokurikulum enggau pekara nembiak ba sekula diri empu ti bepelasarka instrumen SKPMg2.

Nambahka penemu enggau pengelandik ngaduka matapelajar enggau pengelandik instruksional PdP ba raban Ketua Panitia (KP) matapelajar ba sekula diri empu bepelasarka instrumen SKPMg2.

Lebuh bejaku bejadi program tu, Sagah mega madahka Negeri Sarawak ulih maju ngemansangka energi ulih dikena baru ngena konsep teknologi gadung sereta enda ibuh begunaka bantu tebangkar ari menua luar.

Iya madahka pekara nya ulih dikemujur nyema kelebih agi Opis Pelajar ulih nempa raban gradute ti landik dalam bidang nya.

Sama bisi ngulu pengerami tu, Sapit Menteri Pemansang Pengelandik Sarawak Datuk Francis Harden hollis, Sekretari Mendam Opis Menteri Pelajar, Inovasyen enggau Pemansang Pengelandik Datu Kameri Affandi, Direktor Opis Pelajar Negeri Sarawak Datu Azhar Ahmad enggau sida ke bukai.
 

  • oleh
  • Advertisement