Anda di sini

Minyak makai ti ditikika rega enda disengkaum dalam AKHAP

Advertisement
 

PUTRAJAYA: Minyak makai ti diripotka bisi niki rega nyentuk ke RM10 ungkup butul lima kilogram (kg),enda disengkaum ari baruh Akta Kawalan Harga dan Antipencatutan (AKHAP) 2011 laban nya dalam kategori minyak makai champur.

Menteri Dagang Dalam Negeri enggau Pekara Penguna, Dato Sri Alexander Nanta Linggi madahka minyak makai ti dipadahka bisi niki rega, iya nya chap Knife enggau Red Eagle ti ukai dalam kategori jaga undang - undang AKHAP 2011.

"Kebuah pia, nya kategori 'minyak makai champur', ukai  'minyak makai tulin'," ku iya madah nengah Twitter rasmi iya kemari bekaul enggau rega minyak makai ti balat niki rega. 

Nitihka ripot, rega minyak makai 'sebatian' lima kilogram chap Red Eagle enggau Knife dikatu dipadahka berega RM45 enti dibandingka enggau rega sebedau maya pandemik COVID-19 ti urung RM30 nyentuk ke RM35.

Ku Nanta berengkah ari 1 Ogos nyin tadi, rega runchit maksimum minyak makai sawit tulin ti dijual dalam butul iya nya RM29.70 ungkup 5kg; RM18.70 ( 3kg); RM12.70 ( 2kg) enggau RM6.70 bagi sekilogram.

Ku Nanta baru, taja pia orang ke bejual enda tau sepeneka ati  'bemainka' rega minyak makai champur ke dijual.

Ku I ya, Opis Menteri Dagang Dalam Negeri enggau Pekara Penguna (KPDNHEP) bisi bidang kuasa mansik nitihka AKHAP, nitihka pelasar ngambi untung.

Ku iya, nutis ngagai premis dekan digaga nitihka Seksyen 21 AKHAP lalu nyema bisi gaya dipeda kelalu ngambi untung, ukum nengah undang – undang tau dipejalaika nitihka Seksyen 14 (1) akta ti sama.

Enti ditemu salah, tau diukum mata duit RM500,000 enti nya gerempung tauka kompeni lalu ungkup ke ukai gerempung tauka tauka individu, tau diu kum bata duit nyentuk   RM100,000 tauka dijil enda ngelui ari tiga taun tauka kedua-dua nya sekali.

Ku iya, KPDNHEP udah dipadahka pasal kes nya lalu deka bejalaika atur. -- BERNAMA
 

Advertisement