Anda di sini

Subsidi kena nyambung elekterik ke rumah agi diberi

Advertisement
 Dr Abdul Rahman lebuh ke dirandau media pengudah ngelancharka Program Nanam Pun Kayu beserimbai enggau Hari Nanam Pun Kayu Sedunya ba Taman Botani Sarawak , kemari. Gambar  - Muhd Rais Sanusi
Dr Abdul Rahman lebuh ke dirandau media pengudah ngelancharka Program Nanam Pun Kayu beserimbai enggau Hari Nanam Pun Kayu Sedunya ba Taman Botani Sarawak , kemari. Gambar - Muhd Rais Sanusi

KUCHING: Subsidi ke diberi kena nyambung elekterik ke rumah ti dipejalaika perintah Sarawak kenyau ari taun 2020,agi diteruska.

Sapit Menteri Utiliti enggau Telekomunikasyen (Utiliti) Datuk Dr Abdul Rahman Junaidi madah, naka ke diatu perintah nadai udah madah pasal ubah ba pekara nya.

“Nyadi, nya agi diteruska ngena Duit Turu Peminta Laun enggau   Tambah (ALAF) ti benung dikereja Opis Menteri Utiliti enggau Telekomunikasyen  Sarawak,” ku iya.

Iya madah munyi lebuh ke dirandau media pengudah bejadi  Program Nanam Pun Kayu beserimbai enggau Hari Menanam Pun Kayu Sedunya ba Taman Botani Sarawak ditu,kemari.

Ku Dr Abdul Rahman, program ALAF iya nya ungkup rumah ke digaga tauka rumah ti tinggal ari projek ke diatu.

Ku iya, Ketuai ruang bilik (KIR) tau minta terus ngagai opis menteri nengah opis pelilih menua ba menua sida empu, kena ngulihka   subsidi tu. 

“Subsidi tu iya nya kena nyambung beka elektrik ari tiang kepenuudi enda tauka tiang ke besemak ngagai umah nya ngena subsidi ti disediaka perintah,” ku iya.

Ku iya, subsidi tu berat agi diberi ngagai raban orang ke bepenatai pemisi mit B40.

Taja pia ku iya, raban M20 enggau M40 mega tau minta ari baruh kemata ti dipejalaika ba renggat opi s pelilih menua, lalu pemendar nya ari opis menteri.

“Naka ke diatu nyauka 20,000 peminta udah kami terima dalam dua taun ke udah. Asai aku nyauka 30 peratus projek tudah dipejalaika,” ku iya.

Ku iya baru, perintah negeri udah ngemansutka agih belan ja manggai RM40 juta kena melanja projek nya dalam timpuh dua taun, berengkah ari nya dilancharka dalam taun 2020.

“Taun keterubah peritah udah ngemansutka belanja RM20 juta lalu ba taun kedua mega, RM20 juta. 

“Asai aku nyauka RM40 juta udah  dipansutka perintah Sarawak ungkup projek tu kena mantu rayat kelebih agi di menua pesisir dikena nyambung elektrik ke rumah sida.

Taja pia, ungkup agih belanja taun tu ku iya, nya bedau dipadahka perintah.  

“Nya alai, kitai agi nganti sida madah,” ku iya.

Lebuh ke ngenang pasal sekeda projek bekal elekterik ti laun digaga kelebih agi di menua pesisir, Dr Abdul Rahman madah nya ketegal kurang orang ke landik tauka kunteriktor elekterik ti diaku Sarawak Energy Berhad (SEB).

“Penanggul nya udah ngujungka kitai napi pemar lebuh nyambung elekterik ba sekeda kandang endur. Tang ba mengeri baka Kuching, Sibu, Bintulu enggau Miri nadai sebarang penanggul.” ku iya.

Advertisement