MIRI: Program pupu bansa patut diatur suah agi kena ngenegapka agi penyerakup bansa enggau pengelantang ba jalai pengarap di Sarawak.
Sekretari Parti Tindakan Demokratik (DAP) Sarawak, Alan Ling madah, pekara nya patut dipajakka kena nentuka negeri tu terus idup lantang sereta likun.
“Konsep nyambut pengabang maya musim pengerami patut dikemeranka ba rayat pupu bansa di menua tu.
“Kitai patut ngatur mayuh agi program pupu bansa kena ngelakuka bisi mayuh bengkah ti lalu nerenak pemereti ati ke manah agi enggau pangan diri ari pupu bansa, budaya enggau jalai pengarap ke bebida,” ku iya m adah ngagai Utusan Borneo lebuh ke ngabang Hari Raya ngagai rumah pengarang berita Utusan Borneo pampang Miri, Steve Annuar di Desa Bahagia di Permyjaya,kemari.
Ba pengawa nyaga penyerakup ke manah enggau pengelantang ba jalai pengarap di menua tu kelebih agi di Sarawak, Alan madahka bisi pematut nerenak pekara ke manah nya ngaga rebak dudi.
Di Sarawak ku iya,nadai isu begedika bansa bukai ketegal pemereti ati ti manah enggau pangan diri.
“Enti bisi isu begedika bansa bukai, isu nya semina digaga orang ti enda manah runding ti nguji nerenak benih pemenchi enggau nyaruka runding rayat.Tang, pekara tu ulih diputarka nengah pemereti ati ke manah.
“Nya alai, kitai mesti fokus sereta ngenataika mesej sentang pemesai reti penyerakup enggau pengelantang ba jalai pengarap ngagai rebak biak ambika sida ulih nyaga pengelikun enggau pengelantang ke bisi diatu di negeri tu,” ku iya.
Berebak engagu nya, iya berasai gaga ati laban ulih besaumka musim Hari Raya Aidilfitri taun tu enggau bala bakih ke megai jalai pengarap Islam, pengudah mayuh prosedur operasyen standard (SOP) diten duka maya ikas penyakit nya majak nurun diatu.
“Pandemik COVID-19 udah ngeruga semua orang kelebih agi maya musim pengerami ngujungka kitai enda ulih ngintu musim pengerami nya begulai enggau diri sebilik.
“Enda ulih pulai ke kampung menua maya musim pengerami dua taun ke udah,udah ngajar kitai pasal pemesai reti nyaga kaul enggau diri sebilik," ku iya.
"Diatu, kitai ulih ngintu musim pengerami baka ke diintu kitai sebedau tu. Ke pemadu beguna iya nya kitai mesti gaga ati enggau kenang manis dalam kaul enggau diri sebilik ," ku iya.
Taja pia, iya ngelalau mensia mayuh ambika terus bejejaga sereta nitihka SOP ke bekaul baka ngena tangkup idung enggau mulut ba endur ditapatka mensia mayuh.
Sekumbang dua taun ke udah ku iya, rayat di Sarawak enggau menua Malaysia, udah balat amat tekeruga laban pandemik COVID-19, tang penyakit nya majak ulih dijaga sereta nurun, rayat diatu dalam proses pulai ngagai pengidup normal kelebih agi dalam sukut ekonomi.