KUCHING: Dalam timpuh fasa pra pandemik Sarawak udah mulaika lebih 90 peratus penyuah penerebai bilun sereta bisi nambahka kuing penerebai bilun baru.
Menteri Dagang Temuai, Industri Kreatif enggau Mandangka Seni Dato Sri Abdul Karim Rahman Hamzah mega ngelaluka dua penerebai antarabansa keterubah ke Sarawak ari Singapura ke Kuching enggau Miri, pengudah dua taun disekat penerebai ketegal pandemik.
Iya ngelaluka penerebai AirAsia ke disambung baru ari Singapura ke Kuching.
“Naka ke diatu, kami udah mulaika lebih 90 peratus penyuah penerebai maya fasa pra pandemik, enggau laluan baru ditambah baka ari Pulau Pinang ke Kuching enggau Singapura ke Miri.
“Aku pechaya enggau pengawa nyambung baru penerebai antarabansa tu setipak bendar ngagai bala temuai enggau rayat menua tu di Sarawak, ti udah tentu deka ngelanggur pejalai enggau kemisi sida.
“Kelimpah ari nya, penendu SOP ti berengkah dipejalaika 1 Mei tu ke nyengkaum enda ibuh ngaga ujian COVID-19 maya sebedau terebai enggau datai, nenduka atur ngena sengkabung idung enggau mulut ba palan mensia mayuh enggau ngerejista penama nengah MySejahtera baka ti dipadahka Opis Menteri Pengerai Malaysia apin lama nya, nya siti pemansang positif ungkup aktiviti dagang temuai pulai baru baka selama,” ku iya.
Abdul Karim mansutka pekara tu dalam aum pengarang berita maya nyambut penatai bilun AirAsia AK 1776 ari Singapura ke Kuching ba Terminal VVIP Padang Bilun Antarabansa Kuching (LAK) ditu, kemari.
Penerebai AK 1776 ke sangkai ba LTAK urung pukul 4.20 lemai kemari mai 180 iku orang tambang ti nyengkaum urung 46 peratus rayat Singapura, 46 peratus rayat Malaysia enggau ke lebih rayat ari menua bukai.
Kelimpah ari nya Abdul Karim mega madahka Sarawak udah nambahka penyuah penerebai domestik ari 562 penerebai ngagai 615 penerebai naka 7 April 2022.
Temuai ari Semenanjung Malaysia ulih ngena penerebai terus ngagai tiga pintu penama Sarawak iya nya Kuching (wilayah selatan), Miri (wilayah utara) enggau Sibu (wilayah tengah).
Ngagai temuai ke deka terebai terus ke kandang menua selatan tau ngena penerebai terus ari Kuala Lumpur, Pulau Pinang, Ipoh, Johor Bahru, Kota Kinabalu, Langkawi enggau Kota Bahru ke Kuching.
Kandang menua utara, temuai ulih terebai terus ari Kuala Lumpur enggau Johor ke Miri. Lalu ngagai temuai ke deka ngagai wilayah tengah ulih ngena penerebai terus ari Kuala Lumur, Johor Bahru enggau Pulau Pinang ke Sibu.
“Kami melabaka deka mayuh agi penerebai ti deka datai kitu enda lama agi,” ku iya.
Sama bisi ba aum pengarang berita tu, Sapit Menteri Perengka Pengangkut Datuk Dr Jerip Susil, Sekretari Mendam Opis Menteri Dagang Temuai, Industri Kreatif enggau Mandangka Seni Hii Chang Kee sereta Ketuai Pemesai Eksekutif Sharzede Datu Salleh Askor sereta Ketuai Komersial Opis Penerebai AirAsia Tan Mai Yin.