KUCHING: Polis Sarawak deka fokus neritka adat sereta matau ba 56 'hot spot' di serata Sarawak dalam 'Op Selamat Ke-18' beserimbai enggau pengerami ngintu Hari Raya Aidilfitri.
Komisioner Polis Sarawak Datuk Mohd Azman Ahmad Sapri madah,palan nya mungkur 36 iti Jalai Persekutuan enggau 20 iti Jalai Negeri ti suah alai penusah bebadi nyadi.
Ku iya, tuju operasyen tu awakka meri asai nyamai sereta selamat ngagai penguna jalai alun sekumbang musim pengerami tu.
"Kami deka meri asai nyamai sereta selamat ngagai penguna jalai alun lalu ngengkahka pemesai enggau raban kami ba 56 iti endur ke dipilih, ti suah alai penusah bebadi nyadi.
"Kami ngarapka nengah operasyen tu ulih ngurangka penyampau bebadi ba jalai alun sekumbang timpuh musim pengerami tu," ku iya.
Iya madah munyi nya maya aum media Pengudah Pengerami Ngelancharka Op Selamat Ke-18 beserimbai enggau Hari Raya Aidilfitri ba Palan Bebeli Barang Boulevard, ditu kemari.
56 palan ke diberi fokus nya Jalai ba Kandang luar Kuching-Kota Samarahan, Jalai Kuching-Serian, Jalai Bau-Lundu, Jalai Sri Aman-Kuching, Sri Aman-Sarikei, Jalai Pusa, Jalai Pakan, Jalai Machan-Kanowit, Jalai Paradom (Sibu), Jalai Oya-Igan, Jalai Sibu-Bintulu, Jalai Selirik (Kapit), Jalai Bintulu-Tg Kidurong, Jalai Miri-Bintulu, Jalai Batu Danau-Limbang enggau Jalai Lawas-Trusan.
Pengawa matau kandang genturung pendiau mega deka dipejalaika sekumbang Op Selamat nya.
"Tu nya endang kena nagang pengawa jai ngeruga rumah ti ditinggalka maya orang ke ngempu nya kemisi.
"Raban kami deka matau enggau chara belebuh kena nentuka premis enggau rumah ti ditinggalka nya dalam keadaan selamat ari sebarang pengawa jai," ku iya.
Tambah iya, bisi 750 iku raban enggau pemesai polis deka gawa sekumbang Op Selamat Ke-18 tu ti berengkah sehari tu nyentuk ke 8 Mei tu.
Ba pekara bukai, Mohd Azman madah nitihka banding gaya penusah bebadi ba jalai alun dalam timpuh ari bulan Januari nyentuk ke bulan Mac taun tu, penyampau penusah bebadi ba jalai alun di Sarawak bisi m andangka penambah ti ngerikodka 4,253 kes enti dibandingka enggau 3,586 kes dalam timpuh yang sama ba taun 2021.
� Penusah bebadi ba jalai alun ti nabanka nyawa nambah lapan kes ari 64 kes ba taun 2021 ngagai 72 kes,lalu penusah bebadi ba jalai alun ti ngujungka balat bakal, mandangka bisi nurun siti kes iya nya ari 41 kes ba taun 2021 ngagai 40 kes taun tu,� ku iya.
Sama bisi ngulu pengerami nya, Sapit Komisioner Polis Sarawak Datuk Mancha Ata, Ketuai Opis Mansik enggau Neritka Adat Trafik Sarawak, Superintenden Bingkok John enggau Direktor Opis Bomba enggau Penyah Penusah Malaysia (JBPM) Sarawak, Datu Khirudin Drahman.