KUCHING: Menteri Dagang Temuai, Industri Kreatif enggau Mandangka Seni Dato Sri Abdul Karim Rahman Hamzah ngelalu tauka nyambut manah nyema bisi perambu enda neritka atur ngena sengkabung idung enggau mulut di menua tu.
Ku iya, enti bekaul enggau industri dagang temuai nyema atur enda ngena sengkabung idung enggau mulut ditenduka, nya deka meri pengelantang ngagai temuai ari menua luar.
Iya arap bendar Menteri Pengerai Malaysia Khairy Jamaludin tentu deka bejalaika atur nya berenggat lalu ukai ngenyit.
"Semua endang nemu penyakit tauka virus tu agi bisi enggau kitai, nya alai kitai patut nemu sereta endang diperansang ngena sengkabung indung enggau mulut. Enti kitai ba endur ti betutup sekalika dalam perengka pengangkut mensia mayuh baka bilun, baum dalam bilik. Nyema ba palan tebuka, maya bejoging tauka palan bebeli barang besai, aku arap bendar nya bepanggai ba individu.
"Tang aku nyadi ke menteri dagang temuai, aku ngelalu tauka nyambut manah laban tu mantu industri dagang temuai. Mayuh orang ke datai ari menua luar nadai agi ngena sengkabung idung enggau mulut, lalu lebuh datai kitu diasuh ngena sengkabung idung enggau mulut sida berasai enda lantang ati.
"Kitai meda menua bukai di dunya, baka malam tadi (ensanus) aku meda Manchester City ngelaban Real Madrid ba siti stadium penuh, orang nadai ngena sengkabung idung enggau mulut. Bepuluh ribu nadai ngena sengkabung idung enggau mulut. Aku ngasaika kitai enggau belelubah nuju ngagai fasa nya," ku iya.
Abdul Karim ditanya pekara nya dalam aum pengarang berita Dana Mudahcara Warisan, Kesenian dan kebudayaan Sarawak ke diatur ba Bilik Aum Mulu, Opis Menteri Dagang Temuai, Industri Kreatif enggau Mandangka Seni (MTCP) ba Ringkat 17 Begunan Baitul Makmur Sayap Kanan ditu, kemari.
"Taja pia enti kitai nemu diri bepenyakit patut ngena sengkabung idung enggau mulut, lalu enti kitai ngasaika diri bepengerai tau enda ibuh ngena," ku iya.
Kelimpah ari nya ditanya bekaul enggau jematan Mulu Marriott & Spa ke runtuh enggau empat iku bakal Hari Dua apin lama, Abdul Karim madahka pekara nya enda diadang nyadi sereta baka dipadah sida nya benung meda tauka matau jematan nya laban engka nemu mayuh orang deka datai ke Mulu.
"Nama ke digaga sida nya ke bendar dalam proses ngemanahka agi, meda endur ke rusak tauka jai, tang enda diadang labuh.
"Lalau aku ngagai semua pengemeran dagang temuai sekalika homestay, Opis Kaunsil ke mayuh nyaga palan dagang temuai ambika seruran matau sereta beratika palan ke dijaga sida ke deka dilawa orang ti datai ari menua tu tauka menua luar, kena nyikap tauka nyendiaka diri nerima orang ke datai, sereta nyeliahka pekara ti enda manah nyadi," ku iya seraya ngelalau orang ke nyediaka bot, van enggau ke bukai ti bekaul enggau industri dagang temuai patut ngemeratka pengelikun.