KAPIT: Sekretari Perintah Negeri Datuk Amar Jaul Samion udah nemuai seraya kereja ngagai Tunoh, dalam Pelilih Menua Bukit Mabong di Baleh, bedau lama udah.
Iya disempulang Ketuai Pengatur Pengereja Pengawa ba Opis Premier Nicholas Sia, Residen Kapit Nyurak Keti, Sapit Residen Galong Luang, D.O Bukit Mabong Robert Liman, D.O Kapit Cerisologo Sabut enggau D.O Belaga Juan Ubit, Tuai Kunsil Opis Pelilih Kapit Lating Minggang, OCPD Kapit DSP Freddy Bian, Injinir Bagi Menua Kapit Bujang Kanang, Pemancha Steward Sawing enggau bala bukai.
Lebuh nemuai sehari ke Tunoh nya, Jaul bisi ngabas pengawa ngangkatmanah sereta nukar rumah temuai sementara perintah nyadi Opis Pelilih Menua Bukit Mabong sementara ke udah tembu digaga, sereta bejadi pengawa muka kaunter Opis Pelilih Menua Bukit Mabong. Iya mega bisi ngabas taba palan ngaga Opis Pelilih Menua Bukit Mabong enggau Opis Betanam Betupi.
Berebak enggau nya, Jaul mega lalu nyadi saksi pengawa nyerahka pangku pengawa ari ex-D.O Pelilih Menua Bukit Mabong, Douglas Pungga ngagai D.O Pelilih Menua nya ke baru, Robert Liman.
Tunoh udah dipilih nyadi palan ngemansangka pasar enggau Opis Pelilih Menua kena ngemansangka Bukit Mabong. Tunoh mungkur pemesai 50,000 hektar ti ngembuan tanah landai ba kaki Bukit Mabong. Fasiliti ti diperambu deka digaga dia iya nya pasar, padang bilun mit, klinik, Opis Pelilih Menua enggau Opis Betanam Betupi,BAlai Polis, Kem Soldadu enggau ke bukai.
Sebedau tu dalam taun 2021, perintah udah ngungkupka RM 5 juta kena ngubah sereta ngangkatmanah rumah temuai sementara nyadi Opis Pelilih Menua Bukit Mabong sementara. Enggau penembu pengawa ngaga Opis Pelilih Menua Bukit Mabong sementara nya, sida tau mindahka operasyen ke Tunoh. Diatu Opis Pelilih Menua Bukit Mabong iya nya ba Kompleks Nengeri Bletih.
Lebuh ke dirandau, D.O Pelilih Menua Bukit Mabong Robert Liman madahka kaunter opis pelilih menua nya deka dikula enda lama agi, lalu bala pemesaiopis deka diasuh gawa di Tunoh ambika bisi meri servis ngagai mensia mayuh din. t
Niang Kepala Menteri,Adenan Satem dalam bulan Februari taun 2016, udah ngemendarka Bukit Mabong nyadi pelilih menua baru ke mungkur semua sitak Kunsil Negeri Baleh. Tunoh nyadi pasar enggau palan opis perintah ke deka nyadi pematak mensia mayuh ngagai pasar nya. Penyauh Tunoh ari Kapit iya nya 100 kilometer sereta tau dilawa nengah jalai kompeni kayu batang.
Taja pan sepenyauh 100 kilometer ari Kapi sereta nadai jalai ke manah, orang tau ngelawa Tunoh ngena kerita 4WD ari Kapit nengah jalai ke mar ditengah sereta bebukit, ti begunaka timpuh urung tiga jam. Enti deka nyatar kerita 4 WD ti disediaka peranak menua nya, deka dipinta mayar RM 1000 nyentuk RM 1500 pejalai pulai mansang.
Bisi lima ribu iku rayat di Tunoh sereta 20, 000 iku dalam Pelilih Menua Bukit Mabong.
Tunoh udah dipilih alai numbuhka opis perintah laban endur nya strategik amat sereta ba tetengah aset perintah. Meraka kandang bukit nya bisi Tekad Ai Hidroelekterik Bakun enggau Tekad Ai Hidroelekterik Murum lalu ba sepiak tu diperambu alai ngaga tekad Ai Hidroelekterik Baleh.
Nya kebuah pekara nyaga pengelikun aset perintah amat dikemeratka. Berindik ari nya, perintah deka nyaga pengelikun nengah pengawa ngaga padang bilun Tunoh ( proje benung digaga) Balai Polis enggau Kem Soldadu.
Dulu ari tu, kena nyendiaka kuasa ti tau dipechaya sereta beresi, perintah udah ngaga loji kuasa solar hibrid ke beungkus RM 20 juta kena mekalka elekterik 24 jam di Tunoh.
Tunoh bisi potensial besai dikemansangkaka laban ngembuan kandang bukit ke peninggi 7,000 kaki ti mungkur 200,000 hektar kampung galau enggau Sungai Tunoh ti tau nyadi pematak bala temuai. Kelimpah ari nya, mega bisi 50,000 hektar tanah landai ti manah amat alai nanam bemacham bansa utai tanam. Enti dikemansangka enggau manah, Tunoh tau nyadi 'periuk asi' Sarawak laban ngembuan tanah ke ami.