KUCHING: Sarawak deka ngembuan Palan Sains Sarawak (SSC) dalam taun 2024, ti nyendiaka platform belajar enda formal enggau nempa literasi saintifik ngagai rayat di negeri tu.
Menteri Pelajar, Inovasyen enggau Pemansang Pengelandik Datuk Roland Sagah Wee Inn madah, penembu SSC nya ila, deka nyadi palan ke beguna ngerinduka ati ngagai mensia mayuh belajar nengah 'play-with-science', sereta ulih meretika agi pasal sains enggau teknologi.
Nitihku penerang iya, SSC ti beungkus urung RM200 juta ke digaga enda jauh ari Jalai Stadium diatu, ba renggat meresi tauka ngaga taba sereta dipelabaka ulih ditembuka dalam taun 2024.
"SSC ti baru deka bejalaika tangkup pengawa ke beguna nyendiaka platform belajar enda formal enggau nempa literasi saintifik ngagai rayat di negeri tu.
"Palan Sains tu deka nyendiaka pemandang ti interaktif enggau ngerinduka ati ngagai bala nembiak enggau mensia mayuh. Sida deka ulih ngasaika peneleba belajarka kinestetik ti begunaka palan nyerungkai sains enggau aktiviti fizikal ari ti mendingka licha tauka meda demonstrasyen.
"Dalam timpuh ti sama, program enggau woksyop ba palan sains ulih nyikap kurikulum sains sekula nengah chara belajar sechara hands-on, inquiry-based learning culmunating dalam projek ungkup nembiak. Tu deka nyadi nyadi platform pemadu manah ngagai pengajar, nembiak, apai indai enggau komuniti pengawa dagang beserakup, ti rinduka sains," ku iya,
Sagah madahka pekara nya ba aum pengarang berita pengudah bejadi '4th and 5th of SSC Masterplan Workshop' ti diatur Opis Menteri Pelajar, Inovasyen enggau Pemansang Pengelandik ba BCCK ditu, kemari.
Lebuh ti ngenang bekaul enggau woksyop nya, Sagah madahka woksyop pelin besai SSC ke-4 enggau ke-5 begulai konsultan ari Singapura keterubah iya diatur berandau betunga mua, lalu aum sebedau tu diatur ngena zoom beduduk ari menua betapi enggau pandemik COVID-19.
Program tauka woksyop sehari nya diatur enggau kerejasama ari sida Palan Sains Singapura, lalu batang tuju kena nyerungkai chara kena ngangkatka sinergi entara stakeholder kena ngemansangka peneleba orang ke datai ngambika meri empas enggau penyelai, enggau program belajar enda formal bepalan ba SSC baru.
"Objektif woksyop tu mega iya nya kena nyendiaka platform bekunsi chara ti pemadu manah ba pengawa pemansang STEM enggau program belajar enda formal, lebih agi kena nyapai juluk raban bansa ngelala saintifik.
"Nambah nya, kena nambahka pemereti ati palan sains enggau empas iya ba pelajar enda formal STEM ngagai raban bansa enggau mensia mayuh di Sarawak," ku iya.
Kelimpah ari nya, ditanya kebuah milih menua Singapura nyadi konsultan, Sagah madahka Palan Sains Singapura ti pemadu tuai ba rantau tu, iya nya 45 taun udah ditumbuhka, sereta mayuh pengelebih enggau peneleba.
"Kitai mega nemu, sida (Palan Sains Singapura) udah ngereja pekara ti chukup manah di rantau tu, lalu sida mega bisi kerejasdma enggau menua bukai dalam rantau Asia Pasifik. Nya alai kitai arap bendar kitai udah ngaga pilih ti betul," ku iya.
Sama bisi ngulu pengerami tu kemari Sapit Menteri Pelajar, Inovasyen enggau Pemansang Pengelandik Datuk Francis Harden Hollis enggau Dr. Annuar Rapa'ee, Sekretari Mendam Opis Menteri Pelajar, Inovasyen enggau Pemansang Pengelandik Datu Kameri Affendi sereta Ketuai Pemesai Eksekutif (CEO) Palan Sains Singapura Dr Lim Tit Meng enggau sida ke bukai.