Anda di sini

Bobby sepenemu enggau Salang bekaul isu nyiri bansa Dayak dalam opis perintah 

Advertisement

SIBU: Presiden Parti Bangsa Dayak Sarawak (PBDS) Bobby William sepenemu enggau Presiden Parti Rakyat Sarawak (PRS) Datuk Joseph Salang bekaul enggau isu nyiri bansa Dayak dalam opis perintah.

Ku Bobby, penerang ti dipansutka Salang maya Aum Pengari Tiga Taun Sekali (TDC) PRS ujung minggu nyin tadi, endang ngena amat sereta patut dikemeratka semua.

"Pekara keterubah, bansa Dayak suah ditisih ari mayuh pekara endang amat nyadi serrta tau dipeda nitihka statistik dalam opis perintah. 
 
"Berapa mayuh anak Dayak ti mangku pengawa JUSA A, JUSA B enggau JUSA C ? Tebal agi anak Dayak ke pandai sereta bisi penau nadai diberi endur tauka diterima bekereja ba opis perintah.

"Utai ke disebut aku tu ukai nya bula laban ngelama tu lebuh aku bejaku pasal pekara tu, mayuh ke sepenemu madahka pekara nya bula lalu semina kena ngulihka undi aja.

"Nya alai diatu, enti utai ke dipadahka aku ngelama tu bula,reti nya  Salang sama mega bula (dalam isu mangku pengawa perintah)," ku Bobby madah nengah penerang, kemari.

Bobby William
Bobby William

Bobby mega sepenemu bekaul enggau pengurang raban bansa Dayak enggau dalam kompeni bekaul perintah (GLC), kelimpah ngarapka Premier Sarawak Abang Johari nyadi Premier ungkup semua rayat lalu ukai semina ungkup penyukung Gabungan Parti Sarawak (GPS).

Ku iya, sada PBDS sebedau tu mega dipendingka perintah GPS kelebih agi bekaul enggau Kort Bumiputera (Native Court) ambika diberi kuasa penuh (force of law).

"Kami mega ngarapka Salang sepenenemu enggau PBDS ambika perintah meri surat pala tanah nitihka Seksyen 18. Tu utai ti ditegika PBDS kenyau ari taun 1983 suba," ku Bobby.

Ku Bobby baru, PBDS enggau PRS sebaka pekara ditegika laban PRS parti ti ditumbuhka ketegal penyarut dalam PBDS ba taun 2004.

"Aku arap amat Salang siku ketuai ti beratka pekara ti ditegika bansa Dayak laban lebuh PBDS dikinsil rejista suba, iya nyadi pengari rayat ti nadai parti ari taun 2004 nyentuk ke taun 2008.

Nyadi presiden PBDS, iya ngarapka ulih betemu sereta berandau enggau Salang pasal penanggul ke malut bansa Dayak ti agi jauh amat tinggal.
 

Advertisement