Anda di sini

PRS deka nyadi parti pengangkat semengat raban bansa Dayak

Advertisement
Salang (dua kiba) ngerami hari jpengada Mandal Presiden, Datuk Wilson Ugak Kumbong (dua kanan) maya Pengerami Makai Lemai TDC Ke-5 PRS di Sibu, malam ensana.
Salang (dua kiba) ngerami hari jpengada Mandal Presiden, Datuk Wilson Ugak Kumbong (dua kanan) maya Pengerami Makai Lemai TDC Ke-5 PRS di Sibu, malam ensana.

SIBU: Ketuai baru Parti Rakyat Sarawak (PRS) dekaka parti nya ukai semina dipeda nyadi pampang politik aja tang mega nyadi pampang sosial kena ngangkat semengat raban bansa Dayak.

Presiden PRS Datuk Joseph Salang Gandum madah, deka mantaika program ke alai Kaunsul Besai PRS deka ngelawa semua 38 pampang parti.

Tu nyengkaum pampang ti nadai pengari rayat dalam kaunsil besai parti, ku iya.

"Anang enda ingat kaban parti kitai tauka orang ba pampang tu, kitai mesti meransang mayuh agi rayat Sarawak ti bedau masuk sebarang parti politik, dilaluka enggau kitai.

"Taja pan sida ukai kaban kitai, awakka mih kitai lantang ati enggau barang utai ti digaga kitai ba pampang tu," pia ku iya lebuh bejaku maya Pengerami Makai Lemai Aum Pengari Tiga Taun Sekali (TDC) Ke-5 PRS ba sebuah hotel tebilang ditu, malam ensana.

Salang mega madahka Kaunsil Besai PRS bisi berundingka ngiga chara kena melanja pampang parti ti nadai jalai pemansut belanja kediri empu.

Ku iya, duit turu kena mantu pampang ngatur mayuh agi  iaktiviti.

"Tu nyengkaum nentuka pampang nya ukai semina aktif sebeldau TDC tang mega aktif pengudah TDC.

"Tentu bisi sekeda ngumbai sida semina diguna enti udah semak enggau pengawa bepilih tang enda diguna agi pengudah pengawa bepilih.

"Tu endang pengamat peragam ati laban suah agi enda dikeingat sereta enda dikeibuhka.

"Nya alai kami enggai meda pekara tu nyadi. Kami dekaka tetiap pampang nya beguna," ku iya.

Salang mega dekaka Orang Indu PRS ngambi mayuh agi kaban orang indu, kelebih agi ti berumur entara 18 nyentuk 28 taun nengah Pewaris PRS.

"Aram mih kitai sama berundingka bakani chara nambah penyereta sida ti kurang diarika dalam organisasyen kitai.

"Aram mih bekerejasama,aram mih kitai ngiga jalai kenanambah manah agi PRS awakka parti kitai nyadi sebuah organisasyen ti deka dikaitka enggau orang deka begauk," ku iya.

Dulu ari nya lebuh ke bejaku, chairman pengatur Christopher Gira Sambang ngansak semua kaban parti chakah agi gawa sereta nyikap diri napi Pengawa Bepilih Besai Ke-15 (PRU15) ambika ulih ngerebut baru kerusi PRS ti udah maya pengawa bepilih ke sebedau tu. 

Ku iya, kaban PRS di Tamin enggau Kakus patut bekerejasama enggau parti komponen Gabungan Parti Sarawak (GPS) awakka ulih ngerebut baru Parlimen Selangau.

Ba PRU14, PRS udah alah ba tiga ari enam kerusi ti diperebutka.

Taja pia, PRS mujur ngenanka Hulu Rajang, Kanowit enggau Sri Aman tang alah di Julau, Lubok Antu enggau Selangau ba jari penyakal.

Lebih ngenusahka agi, PRS telengka kerusi Sri Aman pengudah kaban Parlimen nya, Datuk Masir Kujat ningkilka diri ari parti lalu nyemilik Parti Sarawak Bersatu (PSB) dalam taun 2019.

Sama bisi ngulu pengerami nya, Sapiti Presiden PRS Dato Majang Renggi, Mandal Presiden Kanan PRS Datuk John Sikie Tayai, Sekretari Besai PRS, Dato Janang Bunsu enggau bala ketuai parti ke bukai.

Advertisement