Anda di sini

NGO: Gazet kemisi Hari Gawai, Kaamatan nyadi kemisi hari besai 

Advertisement
Atas, ari kiba) Edward, Evelyn, Paul enggau Samuel lalu ari baruh (ari kiri), Wilfred, Romuald, Robert enggau Dr John. 
Atas, ari kiba) Edward, Evelyn, Paul enggau Samuel lalu ari baruh (ari kiri), Wilfred, Romuald, Robert enggau Dr John. 

MIRI: Sekeda Gerempung Ukai Dikuasa Perintah (NGO) bansa Dayak majak ngansak perintah besai ke ari baruh pegai Menteri Besai Datuk Seri Ismail Sabri Yaakob, ngazet Hari Kaamatan di Sabah enggau Hari Gawai Dayak di Sarawak nyadi kemisi hari besai diserata menua. 

Nengah penerang begulai ti dikeluarka ensana, NGO Dayak nya madahka udah datai ba maya iya Menteri Besai baru nya ngaku kemisi Hari Gawai Dayak ti diintu 1 Jun di Sarawak enggau Pesta Kaamatan kena 31 Mei di Sabah nyadi kemisi hari besai di serata menua setipak enggau juluk konsep 'Keluarga Malaysia' ti dilancharka iya.  

Jaku ansak nya dipansutka tujuh iku ketuai NGO iya nya Sapit Presiden Serakup Pemikir Dayak Sarawak (DTTAS) Edward Awan enggau Sekretari iya Evelyn Julian, Presiden Kongres Kebangsaan Dayak (DNC) Paul Raja, Presiden Serakup Iban Sarawak (PAIS) Samuel Suring, Presiden Serakup Terabai Menua Sarawak (TM) Wilfred Nissem, Presiden Serakup Jaringan Tanah Hak Adat Bansa Asal Sarawak (TAHABAS),Romuald Siew, Presiden Serakup Raban Bansa Salako enggau Rara Sarawak (PERASA) Robert Umping enggau Sekretari Besai Balang Balai Nyabong (BBN) Dr John Brian dalam penerang ti dipansutka begulai nya.

"Hari Kaamatan di Sabah diintu kena 30 enggau 31 Mei lalu Gawai Dayak di Sarawak diintu kena 1 enggau 2 Jun, kami meri langgur penemu ambika kemisi hari besai di serata menua digazet ungkup Hari Kaamatan enggau Gawai Dayak iya nya kena 31 Mei enggau 1 Jun. 

"Lalu hari kemisi tambah iya nya 30 Mei ungkup Pesta Kaamatan enggau 2 Jun ungkup Hari Gawai Dayak, tetap dikena Sabah enggau Sarawak. 

“Nyema setujuka pekara nya, nya patut digazetkan nyadi kemisi hari besai di serata menua berengkah ari taun tu," ku penerang nya. 

Ku sida, kemisi ti digazet kena 31 Mei enggau 1 Jun di serata Malaysia nya beguna amat laban Wilayah Sabah enggau enggau Sarawak deka dipeda dienahka perintah besai enggau manah agi.

"Kemisi ti digazet nyadi hari besai nya mega meri peluang ngagai raban bansa Kadazan, Dusun, Murut, Rungus enggau Dayak ti gawa ba sebarang endur di serata Malaysia, ulih ngintu pengerami Hari Kaamatan enggau Gawai Dayak ba rumah sida empu kelebih agi ba sida ti enda ulih mulaika diri ke menua diri di Sabah enggau Sarawak.

"Ngintu nya ba endur kereja enggau alai sida diau mega meri peneleba sereta mandang lalu ambika bala bakih sida meretika budaya enggau pengawa asal sida pasal penyelai pupu bansa di Malaysia," pia ku penerang nya. 

Ketuai NGO nya mega nyemetak madahka semua orang patut bisi tanggungpengawa ngenegapka agi penyerakup enggau sama bebasaka pupu bansa bukai 

Bebasaka mayuh bengkah jalai pengarap enggau bansa mega nyadi ke pengering enggau penegap politik, pengelikun enggau pemaik dalam pupu bansa di Sarawak enggau Sabah ngelama tu. 

Nya alai, NGO tnya ngarapka pekara nya ulih diterebak di serata Malaysia nengah pengawa ngintu Hari Kaamatan enggau Gawai Dayak di serata menua.

Penerang nya mega madah, kalendar ti disediaka, peraambu opis perintah besai mega suah enda ngemuningka pengerami  tauka utai ti diguna staf ke asal ari Sabah enggau Sarawak.
 
"Nya kebuah kami meri langgur penemu awakka perintah besai ngambi inisiatif mutarka pekara tu bekaul enggau pengerami ti diintu pupu bansa di Sarawak nengah chara ngazet Hari Kaamatan enggau Gawai Dayak nyadi kemiisi hari besai di serata menua.

"Kami ngarapka nengah pengibuhka ke pekara tu, peri ntah besai nyaup nyaga adat, budaya enggau pengerami Bansa Asal Sabah enggau Sarawak," pia ku penerang. 

Advertisement