Anda di sini

Kaban PBB mesti terus beserakup enggau sama diri

Advertisement
Jerip (kiba) nyuaka tepa pengingat ngagai Uggah kelai meri basa ti udah bejadika Aum Pengari Tiga Taun Sekali PBB Pampang Mambong. -Gambar Roystein Emmor
Jerip (kiba) nyuaka tepa pengingat ngagai Uggah kelai meri basa ti udah bejadika Aum Pengari Tiga Taun Sekali PBB Pampang Mambong. -Gambar Roystein Emmor

KUCHING: Sapit Presiden Parti Pesaka Bumiputera Bersatu (PBB) Datuk Amar Douglas Uggah Embas ngelalau kaban PBB ngambika terus beserakup.

Ku iya, penuduk PBB ti majak tegap diatu iya nya laban kaban enggau ketuai nya terus beserakup.

Dalam timpuh lima taun ti udah, ku iya, mayuh pemansang dipejalaika di selampur Sarawak.

Nya alai ku iya, rayat ngasaika PBB ulih ngelindung sida lalu kebuah nya pengawa bepilih nengeri (PRN) nyin tadi Gabungan Parti Sarawak (GPS) menang 76 kerusi Kunsil Nengeri (DUN).

“Faktor kedua nama kebuah PBB majak tegap iya nya penyerakup. Dalam PBB kitai bisi ngemeranka ngaga pemutus ti selubang sepenemu.

“Endang bisi nyadi charut penemu tang dalam PBB nadai penanggul ti enda ulih diputarka enggau chara berandau. Nya kebuah penyerakup tu beguna,” ku iya.

Iya madah munyi nya lebuh ti bejadi Aum Pengari Tiga Taun Sekali (TDC) PBB Pampang Mambong ba sebuah hotel tebilang ditu kemari.

Ba pengerami nya mega, Uggah ti mega Sapit Premier Sarawak sama ngarapka PBB Pampang Mambong deka ngatur forum dikena ngerandauka bekaul aktiviti enggau program ti ulih dipejalaika baka ke dirintai ari baruh Strategik Pemansang Pengudah COVID-19 2030 (PCDS 2030).

PCDS 2030 ku iya iya nya langkar strategik perintah GPS dikena nentuka Sarawak ngemansangka Sarawak.

“Beguna ungkup kaban enggau rayat nemu pelin tu ari baruh PCDS 2030 lalu aku ngarapka PBB Mambong deka ngatur program ngambika rayat ulih bekaul dalam PCDS 2030.

“Mambong iya nya ba palan ti chukup strategik enda jauh ari mengeri sereta bisi potensial dalam produk betanam betupi moden.

“Aku pechaya Ketuai Pampang PBB Mambong Datuk Dr Jerip Susil bisi pelin bakani deka ngemansangka Mambong lalu aku deka meda Mambong nyadi pengeluar kupi di Sarawak,” ku iya nambah.
 

Advertisement