SIBU: Sapit Menteri Pengerai Mensia Mayuh, Pengawa Berumah enggau Kaunsil Kandang Menua II Micheal Tiang temegah ati seruran ngembuan ulah ti siru sereta seruran ngemeratka penusah orang bukai.
Ku iya, tu ulih diayanka enggau pemisi Palan Agape Sibu iya nya semina sebuah aja palan komuniti di Sarawak tauka di Malaysia ke nyendiaka mayuh macham servis komuniti ngagai rayat ti begunaka bantu.
“Betaun ti udah, lebuh kitai ngemunka Palan Agape tu kebendar nya nyentukka diatu Sibu sebuah aja bagi menua tauka di selampur Malaysia ti bisi palan komuniti ke bansa nya ti nangkup guna mensia mauh ti enda sama.
“Sibu nyangka sebuah mengeri ti kurang mansang, tang kandang menua tu dikembuan enggau pengasih sereta ulah ti sama belanyaga pangan diri. Tu ngayanka ngagai kitai, Sibu iya nya dikembuan orang ti chukup manah,” ku iya.
Iya madah munyi nya lebuh ti bejaku ba program pengasih 'Kamek Sayang Kitak' Jom Dermakan Barangan Kitar Semula di Stesyen Petronas, Jalai Teku ditu, kemari.
Sama bisi iya nya Menijer Kandang Menua Petronas Dagangan Berhad (Jabatan Penjualan Runcit dan Operasi Bahagian Perniagaan Runcit) Wong Koh Seng, pengempu Stesyen Minyak Petronas Jalai Teku Dahari Jol, Pemesai Administrasyen Residen Bagi Menua Sibu Awang Mohammad Nizam Awang Ali Bohan enggau ke bukai.
Program tu iya nya diatur begulai enggau Stesyen Petronas, Jalai Teku enggau Opis Residen Bagi Menua Sibu.
Kaban Kunsil Nengeri (ADUN) Pelawan nya madah, program komuniti di Sibu mega suah nerima sukung enggau bantu ari bemacham gerempung, NGO enggau organisasyen bukai ditu.
“Tu ulih dipeda nengah program (Jom Dermakan Barang Kitar) kitai atur tu. Kitai meri tabi basa ngagai Petronas laban ti udah datai mantu sida ti begunaka nya.
“Ungkup aku empu ti ada ditu, seruran besedia meri servis ungkup rayat lalu terus nyukung penuh program pengelantang pendiau enggau komuniti di Sibu,” ku iya nerang.
Beserimbai enggau nya, iya minta NGO, gerempung enggau raban ke bukai ngambika sama meri servis mantu sida ti begunaka nya di Sibu.
Beserimbai enggau tu, Wong madah, asil ti dijual barang ke udah kala dikena nya nengah program tu deka diberi ngagai Palan Transit Orang Ti Nadai Pengentap Pendiau (TTG) Sibu.